1Nabz ne Devet kx yrbzle mz kxrmailz ngr dzbe kxnzngrng. Yawe, nim me rlakitrx. Bzkq rlrpx-ngrn nzaovxiokr enqmi rngeng ninge. A' arlapx ninge, murde ale-zvzq da kxtubq.
2Ayzlu-anim nzyrni-krnge mz nzarlapx-krm ninge. Nanginim butqbr kx namnc-kapqpx-ngrmc.
3Mz nzngini-krm lrpalvc ngr nzrlapxngr, Aclve x mailz ninge mz nzvz-nqblq-krde natqm.
4Bzkq rlr-ngrme nzprtz-krnge mz trtxki kc tzamwi-kapq enqmi rngeng, Murde nim me rlakitrx.
5Yawe, aprcbo mqngrnge mz mqm. Murde nim Gct kc tqbrti drtwr mz nzxpepx-krm ninge.
6Kxetu, abrtxtrpo drtwrnge bam, A' pxtxpx-ngrne krkcng tzangiolr mqngr da txneng kx nzlz.
7Drtwrnge sa naelalzm x na-abrtzlvzx nzaodu-zvz-krm, Murde okatr-zvzq ninge mz mzlir nzetqkr drtqnge x nzkxpu-krngeng.
8X tr-rlr-ngrpwzmeu ninge mz mq enqmi rngeng, A' amnc-nrwx-ngrbzme nabznge mz nzvzne-krnge.
9Yawe, nayc mz drtwrm ninge murde nabznge talvzo. Mzke' vaotxpe-ngrde nzyrni-zlwz-krnge x nrkrdrtqnge mewetxpengr.
Sam 31
Sam 31:1-9