SAM 24:2-8

²Ita keu andaka tasikuu yangga amaakatang yuwawan engatangan tasike tekut. Ngan, keu andaka tasikutdane yapii gwenu yanggabam gwende banakan tasikut.

³Mamin amin tapata tawanu Anututa yuak dakane take kopik? Wena. Sike mamin amin tapata Anututane you takwan buyambam gwenu yuaune take koke yuwik? Wena siknga.

⁴Aminu tapatuta waiaknga dua tasike musiaatangu gutongana wena, gatu anutu pupukngae munu dua puwik, siwan kem wamde enandang ngangu notnaapa dua yaninggak.

⁵Aminu waapae Buyambam tapata take tasingamik. Ngan, Anututa aminu waapa meyana sandekgak. Siwan ita anzing iniwik, “Ga amin noman,” ngang iniwan iwanata wamu yananga dua.

⁶Aminu unzing kapatanu Anutue musiane natanggamatakaing. Unzing aminda Anutu Jekopda banip sikut tapae wesimu akukaing.

⁷Ginu gwambok gwakgwau ginu zitnong. Ginu gwambou tupa siknga nana, ginu gatukande zitnong. Kingu tupan tapa undang kopikge zikngamunong.

⁸Sike Kingu tupan tapa mamin? Tupan tapa Anutu awiapa unin. Waapa kekekngana buyambam siknga. Siwan amak tasikengu ita iwana ayapbikgak.