SAM 135:1-9

¹Buyambam tapatane umana yatangenatnong. Ginu Buyambam tapatane puya amina, ginda itane umana initangenatnong.

²Ginu Buyambam tapatane you buyambam gwende yuke puyana pasikaingu, wa Anutunindane you buyambam gwene yuke umana initangenatnong.

³Itane umana yatangenatnong. Dasingge, ita ninde take siknga pasinggak. Ita ninde musip kwikwik natanimunggak. Unzingge ninda kap taike itane umana yatangenatnim.

⁴Sike Buyambam tapata Jekop inae yawan yukut. Ngan, Isrel nana aminu Anututane donga siknga.

⁵Nata natapanu Buyambamtapa umana kopsa siknga. Sike ita anutu pupuknga ayapbike enane siknga yuak.

⁶Buyambam tapata sanga minaka takngatu yekaune gatu keune gatu yanggabam gwene ba yanggabam gwende kutakngine tasinangge natakengu ita atasinggak.

⁷Ita sopa tawikge minga kepna kepna kuupbam tasiwan aakgak. Siwan ita tasiwan yapasik siwawan sopa tanggak. Siwan gatu ita tasiwan got takngata gwatdu gwatdu puyatake kunggak.

⁸Ngan, Isip kep komune ita Isip nanatane waaknga tupan tapaapa atzipa kumbing. Siwan gatu kaapdane ngang zipa kumbing.

⁹Siwan Isip kep komune duya takngatu takngatu tasiwan king kapaat gatu tupan aminaatda kawawa kekekngana une yeuyamukut.