Salmos 78:1-32

¹Asaf isquirbishan alabansa. Marca-masëcuna, yachachishäta sumaj yachacuy. Parlashäcunataga wiyay tantiyacunayquipaj.

²Cananga sumaj willapäshayqui. Unaypita-pacha tantiyayta mana atipashayquicunatami parlashaj.

³Wiyashanchïta, musyashanchïta unay caj awilunchïcunami willapämaranchi.

⁴Noganchïpis wamranchïcunata willapäshun Tayta Diosninchi munayniyoj cashanta, Munayninwan fiyupa allicunata rurashantapis.

⁵Tayta Diosga layta willapar yachachiran Israelcuna wiyacunanpaj. Unay caj awilunchïcunatami willaparan wamrancunata yachachinanpaj,

⁶guepa caj wamrancunapis llapanta musyananpaj, paycunapa wamrancunapis mas guepa caj wamrancunata yachachinanpaj.

⁷Chaynöpanami Tayta Diosman yäracur alli goyäshun. Tayta Dios allita rurashancunatapis manami gongashunchu. Tayta Diospa mandamintuncunata cumlishun.

⁸Chaura unay caj awilunchïcuna mana wiyacoj, mana tantiyaj cashannöga mananami cashunnachu. Awilunchïcunaga caran Tayta Diosman mana yäracojmi; Tayta Dios munashancunataga mana ruraj runacunami.

⁹Efraín trïbu runacuna, lëchanwan pillyananpaj caycashanpita pillyay öraga gueshpir aywacuran.

¹⁰Tayta Dioswan parlashantapis manami cumliranchu. Yachachishantapis manami wiyacuranchu.

¹¹Tayta Dios ima allita rurashantapis, fiyupa almiraypajcunata ricachishantapis gongaycäriranmi.

¹²Tayta Diosga milagrucunata ruraran taytancuna ricaycaptinmi Egiptucho caycaj Zoán particho.

¹³Lamar yacuta ishcan-läman raquirirmi chaupipa päsachiran. Chaura yacuga tapyanömi ishcan lädunpa ichiraycaran.

¹⁴Junajpaga pushaptin pucutay ichiraycaj ñaupaparan. Chacaypana nina rataycajwan achquiparan.

¹⁵Chunyaj chaqui jircacho gagatapis shillirachiran. Chaypitanami aypalla yacu llojshimuran llapan upunanpaj.

¹⁶Tayta Dios gagapita yacuta llojshichimuran. Chaura yacuga jatun mayunöraj aywaran.

¹⁷Chayno ruraycaptinpis awilunchïcunaga juchata ruraran. Chunyajcho Tayta Diospa contran jatariran.

¹⁸Gustashallan micuyta mañashpan musyapayta munaran.

¹⁹Tayta Diospa contran rimaran: «¿Diosga alli micuyta chunyajcho garamashwanchuraj?

²⁰Diosga rasunpami gagatapis shillirachiran. Chaypa yacutapis llojshichimuran mayutano. Yacu gochacar pampatapis ñiticurcuranraj. Ichanga ¿micuyta garamashwanchuraj? Llapanchi runataga aychata ¿garamashwanchuraj?» nir.

²¹Chayno parlajta wiyaycur Tayta Diosga rabyacurcuran. Israelcunapäga nina ratarejnöraj ricacuran. Paycunapäga fiyupa rabyacurcuran.

²²Paycunaga manami yäracuranchu Tayta Diosman. Ni riguiranpischu yanapänanpaj cashantapis.

²³Chayno caycaptinpis Tayta Diosga pucutayta cachamuran. Syëlupa puncuncunapis quichacäcuran.

²⁴Acrashan runacunaman shicwachimuran manäta. Chayga caran syëlucho caycaj rïgumi paycuna micunanpaj.

²⁵Anjilcunapa tantantami runa micuran. Tayta Diosmi aypalla micuyta gararan.

²⁶Tayta Diosmi munayninwan wayrata wayrächimuran. Syëlupita-pachami wayrächimuran.

²⁷Chay wayrawanmi acrashan runacunamanga aychata chayachimuran. Äbicunami shicwamuran lamarcho caj agushnöraj aypallanpa.

²⁸Israelcuna tiyarcaycashan partiman y tolduncunapa ñaupancunaman Tayta Dios shicwachimuran.

²⁹Chaura runacunaga micuran sacsananyaj. Chaynömi Tayta Diosga runacuna munashanno camacächiran.

³⁰Chayraj cushisha micurcaycaptin, jinallaraj amurpaycaptinmi

³¹contran jatarishanpita Tayta Diosga rabyacurcuran. Chaymi mas callpayoj caj runacunata wañurachiran. Israelcho mas mijurnin caj runacunata ushariran.

³²Chaypis yapaymi juchata ruraran. Manami riguiranchu Tayta Dios milagrucunata rurashanta ricasha caycarpis.