SALMOS 56:7-13

⁷Toteco Dios, xijtlachili nochi inintlaixpanolhua huan xiquintlatzacuilti. Ica mohueyi cualancayo, xiquinmajcahua hasta tlalchi.

⁸Ta tinechitztoc quesqui hueltas nimochololtijtoc huan nimochoquilijtoc. Nochi noixayo tijsentilijtoc huan ticajcoctoc ipan se frasco. Huan ipan molibro tiquijcuilojtoc quesqui imiyaca.

⁹NoTeco Dios, quema nimitztzajtzilía para xinechpalehui, nochi nocualancaitacahua nimantzi cholohuaj. Queja nopa eli pampa cuali nijmati para ta tiitztoc nohuaya para tinechpalehuis.

¹⁰Na nimotemachía ipan Toteco Dios. Quena, nimopaquilismacas ipan TOTECO itlajtol, ipampa nochi tlen nechtlajtolcahuilijtoc nechchihuilis.

¹¹Quena, nimotemachía ipan Toteco Dios huan ax nimajmahui. ¿Tlachque huelis nechchihuilis se tlacatl?

¹²NoTeco Dios, nochi tlen nimitztlajtolcahuilijtoc, nijtlamichihuas. Nimitztlascamatilis ica tiohuicatl pampa tinechpalehuijtoc miyac.

¹³Ta, Toteco Dios, tinechmanahuijtoc para ax nimiquis, huan ax tinechcahuilijtoc ma nihuetzi ipan tlamantli tlen ax cuali. Yeca ama noja hueli ninentinemis moixpa nica ipan ni tlaltepactli ica tlacame tlen itztoque.