Salmo 9:11-19

¹¹Sikiyu is menge etew, kentahi niw te kedalig is Nengazen he edhadì diyà te Zion. Iseysey niw ziyà te menge nasyun is nengeveelan din!

¹²Ebelesan din is ebpemendaagdaag, su edseǥipaan din is kebpekitavang te menge dinaagdaag.

¹³Nengazen, dekelà is ked-antus ku tenged te kedèdaaǥa kedì te menge kuntada ku. Ikehizu a kenikew ne libriya a te kemetayen,

¹⁴su wey ku ikeseysey ziyà te menge etew ziyà te menge pultahan te inged he Zion is menge mibeelan nu, he iyan igkezeliǥa ku kenikew. Ne edlipey a zutun tenged te kedlibriya nu kediey.

¹⁵Nehitavù diyà te menge nasyun is mezaat he pelanu zan. Iring te iyan sikandan neulug diyà te vudsi he mibeelan dan, etawa iring te iyan sikandan nelitag te kandan he litag.

¹⁶Impekilala te Nengazen ke hentei sikandin pinaaǥi te metazeng he kedhukum din, ne is lalung he menge etew, iyan nekezezaat kandan is mezaat he menge vaal zan.

¹⁷Kemetayen is egkepeveyaan te lalung he menge etew ziyà te langun he menge nasyun, su ǥeina te ebey-anan dan is Megbevayà.

¹⁸Kenà taman te taman is kebey-ani te Megbevayà te menge egkengeayuayu. Ebpekeperateng gihapun is menge egkengeayuayu he edlibriyen sikandan te Megbevayà.

¹⁹Sigi en Nengazen, kenè nu ituǥut he iyan ebmezeeǥen is kebpekegaga te menge etew zà duen. Hukumi nu is menge nasyun diyà te etuvangan nu.