Salmo 88:6-13

⁶Henduen be te intimbag a kenikew ziyà te vudsi he utew mezalem wey utew merusirem.

⁷Utew a kenikew nepeuki. Is pauk nu iring te menge vaǥel he neketaplì kayi te kediey.

⁸Impekeziyù nu kayi te kediey is menge emiǥu ku. Midhimu nu he utew mezaat is ked-ahaa zan kedì. Nezureng a ne kenà ad ebpekepelaǥuy.

⁹Tenged te menge elentusen ku, ne kenà ad utew ebpekaahà. Nengazen, andew-andew is kebpengumew-umew ku kenikew duma is kebeyawa ku te menge velad ku.

¹⁰Wazè ka mebaal te menge egkein-inuwan para te menge nemematey en, ne wazà sikandan med-enew is edalig kenikew.

¹¹Is gaǥew nu wey kebmetinumanen nu ne kenà egketudtul te nemematey en.

¹²Kenà egkaahà is egkengein-inuwan he menge vaal nu wey is ketazeng nu ziyà te merusirem he lugar te nemematey en, su zutun he lugar kenè en egketenuzan is langun.

¹³Piru siak mulà, Nengazen, ne ebuyù a te tavang diyà te kenikew. Kada meselem ed-ampù a ziyà te kenikew.