Salmo 83:2-14

²Hanu man te menge kuntada nu, egkegurigew zan he edsurung ne ebpegalbu sikandan su ebpekezaag dan kun.

³Duen meeles he pelanu zan he para te kezeetan te menge etew nu he ed-eturen nu.

⁴Ke sikandan te, “Gaang-gaang kew su edèdeetan tew is nasyun he Israel su para melipati en heini taman te taman.”

⁵Nesevaha sikandan te mezaat he pelanu zan. Mid-uyun sikandan te kegkuntada kenikew.

⁶Iyan sikandan kes menge Edomanhen, menge Ismailihanen, menge Moabitanhen, menge Hagarnen,

⁷menge Gibalnen, menge Amunihanen, menge Amalikanhen, menge Filistihanen, wey menge etew te Tyre.

⁸Midtavang daan kandan is Asiria he mezesen he tumetavang te menge kevuwazan ni Lot.

⁹Daaǥa nu sikandan Nengazen, iring te mibeelan nu ziyà te menge Midianhen, wey ziyà te ki Sisera wey ki Jabin diyà te zal-ug he Kishon.

¹⁰Mibpatey sikandan diyà te Endor ne neredak is menge lawa zan ne nehimu he abunu te tanà.

¹¹Dèdeeti nu is menge pengulu zan iring te mibeelan nu ki Oreb, ki Zeeb, ki Zeba, wey ki Zalmuna.

¹²Su migkaǥi sikandan te, “Ed-eǥawen tew is tanà te Megbevayà.”

¹³He Megbevayà, ipeyapat nu sikandan iring te eliyavuk wey ukap he idlayap te keramag.

¹⁴Iring te hapuy he midelandap he nekevinsul te menge kayu ziyà te vuvungan, del-asa nu sikandan ne pelihendeka nu pinaaǥi te vagyu.