Salmo 6:1-10

¹Nengazen, minsan duen nu pauk kedì, ne kenà a kenikew siluti.

²Kehizuwi a wey vewii a, su utew ad meluya.

³Nesemukan utew is isip ku, Nengazen. Keenu e en be kenikew ebewii?

⁴Etura a kenikew, Nengazen, ne ǥeuza a. Tenged te kebmahala nu kediey, libriya a te kemetayen.

⁵Su emun ebpatey a, ne kenè ku en maan sikew egketenuzan; kenà ad maan ebpekezalig kenikew ziyà te lugar te menge minatey.

⁶Mibmeluye e en tenged te utew ku kegkesekiti. Kada mezukilem egkahames is ulunè ku te luhà.

⁷Nemenlevag en is menge mata ku su ebpeketulung ad ebpekesineǥew tenged te vaal te langun he menge kuntada ku.

⁸Sikiyu is memezaat is baal, pekeziyù kew kediey, su nezineg en te Nengazen is sineǥawan ku.

⁹Nezineg din en is kebuyù ku te tavang, ne edtevaken din en is ampù ku.

¹⁰Egkepeel-elezan wey egkengeheratan is langun he menge kuntada ku. Egkengelagewlagew sikandan he ebpekeziyù tenged te kegkeeled dan.