Salmo 68:6-29

⁶Ebeǥeyan din te pemilya sikan is egketawantawan ne melipayen is menge vihag he edlibriyen din. Iyan, is menge mesinupaken mulà, diyà sikandan ebpekeubpà te meinit he lugar he memaza is tanà duen.

⁷He Megbevayà, hein mibpenguluwan nu is menge etew nu te kedhipanew ziyà te sibsivayan,

⁸nehuyung is tanà wey mid-uzan su geina te nekeuma ka, is Megbevayà te Israel. Impezayag nu is keugelingen nu ziyà te Sinai.

⁹Ne wazà kurang te uzan he imbeǥey nu, umbe nepurung mahames is memaza he tanà he imbeǥey nu ziyà te menge etew nu.

¹⁰Ne zutun med-ubpà is menge etew nu, ne tenged te keupiya nu mibeǥayan nu is menge pubri he menge etew te egkinehenglanen dan.

¹¹Nenelaan ka, Nengazen, ne impenudtul haazà te mahabet he menge vahi:

¹²“Nemelaǥuy is menge hadì wey is menge sundaru zan, ne is menge azen dan mibahin te menge vahi he tig-Israel.

¹³Minsan sikan is mibpetaǥak diyà te tudil te menge kerehidu nekezawat te vahin he menge ledawan he merepatik, he is menge pakpak dan mid-epizan te pelata ne mid-epizan te lunsey he vulawan is purù dutun te pakpak dan.”

¹⁴Hein impedsusuwey te Megbevayà he Mekeǥeǥehem sikan is menge hadì, henduen sikandan te menge ayis he midtanà diyà te Buntud he Zalmon.

¹⁵Utew mekempet is Buntud he Bashan; mahabet is menge vuvungan dutun.

¹⁶Maan is nesina heini te vuntud he mibpilì te Megbevayà he iyan ed-ubpaan din te wazà pidtemanan?

¹⁷Nekeuma is Nengazen diyà te valey zin he ebpuun diyà te Sinai duma te linibu he menge kerwahi zin.

¹⁸Hein mibpeketikang sikandin, mahabet he menge vihag is mid-uwit din, ne midawat din is menge gasa he ebpuun diyà te menge etew, minsan is ebpuun diyà te mesinupaken kandin. Ne kayi te kenitew ed-ubpà is Nengazen he Megbevayà.

¹⁹Ereg he edeliǥen is Nengazen he Megbevayà he menluluwas tew, su andew-andew edtevangan kiw zin te menge prublima tew.

²⁰Is Megbevayè tew, Megbevayà he edlibri. Iyan sikandin Nengazen he Megbevayà he edlibri kenitew te kemetayen.

²¹Kenà duwazuwa he ebekbeken te Megbevayà is ulu te menge kuntada zin he kenà ed-engked te kebaal te salà.

²²Migkaǥi is Nengazen te, “Ibpelikù ku is menge kuntada ku he ebpuun diyà te Bashan; ibpelikù ku sikandan ebpuun diyà te zizalem te zaǥat,

²³su ebpenhimetayan sikandan ne edtekutakan niw is lengesa zan ne edtulungan heini ebpendilai te menge asu niw.”

²⁴He Megbevayà wey Hadì ku, egkaahà te langun is kedsilibraha te menge etew nu te kezeeǥan nu pinaaǥi te kedhendiyè dan te valey nu.

²⁵Edhuna is ebpemenganta, ne ebpehuziyan is ebpemenduyug te kanta, ne ziyà te pid-elangan dan iyan is menge raǥa he ebpezaǥing te menge tamburin.

²⁶Ne ibensag dan is lalag he edhenduen te, “Deliǥa niw is Megbevayà ke edtiǥum kew! Sikiyu is langun he kevuwazan ni Israel, deliǥa niw is Nengazen!”

²⁷Edhuna is deisey he tribu ni Benjamin, ne iyan edtinundug is menge pengulu te Juda duma is menge grupu zan, ne edtinundug kandan is menge pengulu te Zebulun wey Naftali.

²⁸He Megbevayà, ipeehè nu is gehem nu iring te mibeelan nu ziyà te kenami zengan.

²⁹Tenged te valey nu ziyà te Jerusalem ed-uwit is menge hadì te ǥasa zan kenikew.