Salmo 31:5-17

⁵Idsarig ku kenikew is untung ku. Libriya a kenikew, Nengazen, su iyan ka kes Megbevayà he egkeseriǥan.

⁶Utew ku egkeepesi is menge etew he ed-azap te wazà menge pulus he menge ed-ezapen, su ziyè e man mulà te kenikew medsarig, Nengazen.

⁷Egkelipey a su veliǥeǥawen ke man. Ne wazà mekeeles kenikew is menge elentusen ku, ne netuenan nu is menge kelised ku.

⁸Wazà a kenikew iveǥey ziyà te menge kuntada ku, kekenà, midlibri a kenikew te kezeetan.

⁹Kehizuwi a, Nengazen, su edlised e en. Nemenlevag en is menge mata ku te kedtulung ku kedsineǥew, ne mibmeluya ad.

¹⁰Layun ku zuen igkeseeng. Nepipire en he tuig is kebpeketulung ku kebpekesineǥew. Mibmeluya ad tenged te menge elentusen ku, ne henduen be te wazè en desen te menge tulan ku.

¹¹Ebpeel-elezan a te menge kuntada ku, lavew en is menge emurè ku te inged. Minsan is menge kilala ku ne nengahandek en he ed-uvey kediey. Emun egkeehè e zan diyà te zalan ne ebpekeziyuan e zan.

¹²In-iring e zan en te minatey su edlipatan e zan en. Iyan ked-isipa zan kedì he iring a te ziniyun he nerupet he wazè din en pulus.

¹³Egkezineg ku is kebpenènaasà te mezakel he menge kuntada. Ebpemiligru a minsan hendei a ebpevayà, su mibpelenuwan e zan te edhimatey.

¹⁴Iyan, midsarig a ziyà te kenikew, Nengazen. Iyan ka Megbevayè ku.

¹⁵Is untung ku ne ziyan te kenikew; libriya a te menge kuntada ku he edezaat kedì.

¹⁶Ipeehè nu is keupiya nu kedì te suluǥuen nu; ne ǥeina te mahal a kenikew, ne libriya a kenikew.

¹⁷Nengazen, kenè nu ituǥut he mepeel-elezi a, su ziyà a te kenikew megnganey. Iyan nu zà peel-elezi is menge lalung he etew ne penhimetayi nu sikandan, su wey zan mekepereremek en diyà te leveng dan.