Salmo 18:30-44

³⁰Is kenikew he paaǥi, Megbevayà, ne wazè din sayep. Is lalag nu egkeseriǥan. Iring ka te kelasag te langun he ebuyù kenikew te pengalang.

³¹Iyan ke zà, Nengazen, kes Megbevayà; kes endilungè dey he vatu.

³²Iyan ka ebeǥey kedì te zesen wey ebantey kedì diyà te ibayè ku.

³³Edlig-enan nu is menge paa ku iring te paa te selazeng, para mezesen a he ebpenekezeg diyà te metikang he menge lugar.

³⁴Ebpenuruen a kenikew te kebpekidtebek, iring te kedhingat te mevisekeg he panà.

³⁵Ebpengelangan a kenikew iring te kelasag, umbe nelibri is untung ku. Ed-ipaten a kenikew pinaaǥi te ǥehem nu, Ne nevantug a pinaaǥi te kedtevangi nu kedì.

³⁶Ebeǥayan a kenikew te meupiya he ibayà, umbe wazà mekezugkilas is menge paa ku.

³⁷Midal-as ku is menge kuntada ku ne nesaut ku sikandan. Ne human a medlikù hein nengezaag ku en sikandan.

³⁸Midezeetan ku sikandan ne nengepiley zan diyà te uvey te nehitindeǥan ku, ne kenè en sikandan ebpekeenew.

³⁹Mibeǥayan a kenikew te zesen te kebpekidtebek, ne nengezaag ku is menge kuntada ku.

⁴⁰Mibpepeleǥuyan a kenikew te menge kuntada ku, ne midezeetan ku sikandan.

⁴¹Mibuyù dan te tavang, piru wazà midlibri kandan. Nengumew-umew zan kenikew, piru wazè nu sikandan tevaka.

⁴²Midruntek ku sikandan taman te neiring en sikandan te eliyavuk he idlayap te keramag. Midtekutakan ku sikandan he iring te tunaan diyà te menge zalan.

⁴³Midluwas a kenikew te ribildi he menge etew. Midhimu a kenikew he pengulu te menge nasyun. Is menge lumelengyawà ne ebpenilbi kedì.

⁴⁴Midluhud sikandan kedì tenged te kegkehandek dan, ne midtuman dan is suǥù ku.