Salmo 140:6-13

⁶He Nengazen, iyan ka Megbevayè ku. Pemineǥa nu, Nengazen, is kebpehizuhizu ku kenikew.

⁷Nengazen he MEGBEVAYÀ, iyan ka mezesen he menluluwas ku. Iyan ka nengalang kedì te timpu te tebek.

⁸Nengazen, kenè nu ituǥut diyà te lalung he menge etew is tinguhè dan. Kenè nu mehimuwa he medlampus is tuyù dan, su kela ke mekepezalig dan.

⁹Berakat he meuney is menge kuntada ku he nekelingut kedì te mezaat he tuyù dan pezem kediey.

¹⁰Berakat he meuluǥi sikandan te regreg, ne iulug sikandan diyà te menge vudsi ne kenè dan en mekaawà.

¹¹Berakat ke kenè en mebpedayun kayi te tanà is menge etew he menge tigbutangbutang te zuma. Berakat daan he meumahi te vangkit is menge mesipala he iyan ebpekezezaat kandan.

¹²Nengazen, netuenan ku he edlevanan nu is ketenged te menge ayu-ayu; ibeǥey nu kandan is hustu he kukuman.

¹³Siguradu he edeliǥen ka te menge metazeng ne ebpengungubpaan sikandan duma kenikew.