1Nengazen, midsusi a kenikew umbe nekilala a kenikew.
2Netuenan nu ke keenu a ebpinuu wey edhitindeg. Minsan diyè ka te meziyù netuenan nu is nengetaǥù te isip ku.
3Egkaahà a kenikew ke edterebahu a wey ke edhimeley a. Netuenan nu is langun he ebeelan ku.
4Nengazen, minsan kenè e pa ebpekekaǥi, ne netuenan nu en he zaan ke hengkey is egkeǥiyen ku.
5Diyè ka te peliǥuy ku, ne egkelesaǥan a kenikew pinaaǥi te ǥehem nu.
6Is kegketueni nu mehitenged kediey ne utew egkein-inuwi; kenè ku heini egkesavut.
7Hendei e man ebayà para melikayi ku is Mulin-ulin nu? Egkehimu ve he ed-elesan ku sikew?
8Emun edhendiyà a te langit, ne ziyè ka; emun edhendiyà a te iveyaan, ne ziyè ka zaan.
9Emun be e zà ebpekelayang ne edlayang a pehendiyà te edsilaan etawa ziyà a ed-ubpà te utew meziyù he ziyà te edsenlepan,
10ne zutun ka is ed-aǥak wey edtavang kedì.
11Minsan mebpetambun e pa te merusirem wey minsan meveeli pa he mezukilem heini is kerayag he nekeliǥuy kediey kenà a ebpekeeles.
12Su minsan is merusirem ne kenà merusirem diyà te kenikew, ne is mezukilem iring ded kerayag te maandew.
13Nekilala a kenikew su iyan ka mibaal te tivuuk he lawa ku. Iyan ka mibpurma kediey ziyà te ǥetek te iney ku.
14Edeliǥen ku sikew su egkein-inuwan is kebeeli nu kediey. Egkein-inuwan is menge vaal nu, ne netuenan ku heeyan.
15Neehè nu is menge tulan ku hein mibpurma a kenikew ziyà te seled te ǥetek te iney ku.
16Naahà ad kenikew minsan hein wazè e pa mepurma. Is kahabet te menge andew te kegkeuyag-uyag ku ne nekesurat en diyà te libru nu, minsan wazè pa mebpuun is untung ku.
17He Megbevayà, kenè ku egketegkad is menge ed-isipen nu; utew heini mahabet.
18Emun ebilangen ku heini ne edhuna pa he mahabet te menge pantad. Te kegkepukew ku, is isip ku ziyà gihapun te kenikew.
19He Megbevayà, berakat he ebpenhimetayan nu is menge lalung! Berakat he mebpekeziyù kayi te kediey is menge ebpenhimatey te menge etew.
20Mezaat is menge lalag dan mehitenged kenikew. Heini is menge kuntada nu, undaunda is kedsempita zan te ngazan nu.
21Nengazen, egkeepesan ku is egkeepes kenikew. Egkeepesan ku is ebpekigkuntada kenikew.
22Utew ku egkeepesi sikandan; mid-isip ku sikandan he menge kuntada ku.