Salmo 135:1-14

¹Deliǥa is Nengazen! Deliǥa niw sikandin, sikiyu is menge suluǥuen din

²he edterebahu ziyà te valey te Nengazen he Megbevayè tew.

³Deliǥa is Nengazen su meupiya sikandin. Kanta kew te kedalig kandin su hihizuwen sikandin.

⁴Deliǥa niw sikandin su mibpilì din is menge etew te Israel he menge kevuwazan ni Jacob, para mehimu he ispisyal he menge etew zin.

⁵Netuenan ku he mekeǥeǥehem is Nengazen, he lavew te langun he zuma he menge ed-ezapen.

⁶Midhimu te Nengazen is minsan hengkey he egkesuatan din, diyà te langit, dini te tanà, diyà te menge zaǥat, wey ziyà te kinezizeleman kayi.

⁷Impezivavew zin is menge ǥapun he ebpuun diyà te meziyù he menge vahin kayi te kelibutan, ne midhimu zin he mebpengilat duma is ked-uzan. Ibpeǥawas din is keramag puun te neteǥuan kayi.

⁸Mibpenhimetayan din is kinekekayan he menge anak he maama te menge tig-Ehipto, wey is kinekekayan he menge anak te menge uyaǥen dan.

⁹Diyà te Ehipto, mibaal sikandin te menge singyal wey menge egkein-inuwan he menge vaal te kedsilut te hadì te Ehipto wey is langun he menge upisyal zin.

¹⁰Mibpendezeetan din is menge meǥinged diyà te mahabet he menge nasyun wey mibpenhimetayan din is mekeǥeǥehem he menge hadì,

¹¹iring ki Sihon te hadì te menge Amorihanen, ki Og he hadì diyà te Bashan, wey is langun he menge hadì diyà te Canaan.

¹²Ne imbeǥey zin is menge tanè dan diyà te menge etew zin he menge Israilihanen para maangken dan haazà.

¹³Nengazen, is ngazan nu wey is kegkevantug nu egketenuzan taman te taman.

¹⁴Su ibpeehè nu, Nengazen, he wazà mekesalà is menge etew nu he menge suluǥuen nu, ne egkehizuwan nu sikandan.