Salmo 119:39-135

³⁹Kenè nu himuwa he mehitavù kayi te kediey is igkahandek ku he keelezan, su mid-isip ku he meupiya is menge suǥù nu.

⁴⁰Igkesuat ku is kedtuman te menge sulunuzen he ibpesunud nu. Ne tenged te ketazeng nu, pekeluǥeyaza nu pa is untung ku.

⁴¹Nengazen, ipeehè nu is kebmahala wey kedlibriya nu kedì, sumalà is insaad nu.

⁴²Ne zutun egketavak ku is mid-eled-eled kedì, su edsarig a te menge lalag nu.

⁴³Ipekaǥi a kenikew te tutuu, he iyan is menge lalag nu, te minsan hengkey he timpu. Su iyan midseriǥan ku is menge suǥù nu.

⁴⁴Layun ku edtumana is kesuǥuan nu taman te taman.

⁴⁵Kayi te kebpengungubpaan ku ne kenà a uripen, su ebpeninguhà a te kedtuman te sulunuzen nu.

⁴⁶Kenè ku igkeeled is kedtudtul te menge penurù nu minsan diyà te etuvangan te menge hadì.

⁴⁷Utew ku igkelipey is kedtuman te menge suǥù nu he mibmahal ku.

⁴⁸Midtahud ku wey mibmahal ku is menge suǥù nu, ne egngunngunuen ku is menge sulunuzen he ibpesunud nu.

⁴⁹Tentenuzi nu is saad nu kayi te kedì te suluǥuen nu, su iyan heini ebpekeveǥey kedì te perateng.

⁵⁰Egkeuyag-uyag a tenged te penaad nu wey ebpekeveǥey heini kedì te kelipey kayi te menge elentusen ku.

⁵¹Layun a edsudia te menge mepelavawen, piru wazè ku ewai is kesuǥuan nu.

⁵²Nengazen, midtentenuzan ku is menge suǥù nu he neuǥet en he imbeǥey nu, su nekeveǥey heini kedì te kelipey.

⁵³Dekelà is pauk ku, tenged te menge lalung he mid-iniyug te kesuǥuan nu.

⁵⁴Egkanta a mehitenged te menge sulunuzen he ibpesunud nu minsan hendei a ed-ubpà.

⁵⁵Nengazen, emun timpu te mezukilem ne edtentenuzan ku sikew, ne ebpurungan ku ed-is-isipa is kedtuman te kesuǥuan nu.

⁵⁶Iyan heini kelipey ku: is kedsunud te menge sulunuzen he ibpesunud nu.

⁵⁷Sikew, Nengazen, iyan ke zà iyan kinahanglan ku. Midsaad a te kedtuman te menge lalag nu.

⁵⁸Ebpuun kayi te ǥehinawa ku is kedhangyù ku kenikew he kehizuwi a kenikew sumalà te saad nu.

⁵⁹Mid-isip-isip a ke mibmenumenu ku is kebpengungubpaan ku, ne midisisyun a te kedsunud te menge penurù nu.

⁶⁰Ne seǥuǥunè ku midtuman is menge suǥù nu.

⁶¹Minsan pa te mibakus a te menge lalung, wazè ku lipati is kesuǥuan nu.

⁶²Minsan liwazè en te kezukileman egimerat a su ebpeselamat a ziyà te kenikew tenged te metazeng he menge suǥù nu.

⁶³Emiǥu a te langun he edtahud kenikew wey edtuman te menge sulunuzen he ibpesunud nu.

⁶⁴Nengazen, mibmahal nu is langun he menge etew kayi te kelibutan. Penurua-a te menge sulunuzen he ibpesunud nu.

⁶⁵Nengazen, tulengezi a kenikew is suluǥuen nu, sumalà te insaad nu.

⁶⁶Beǥayi a te ketau wey keuluwanen, su edsarig a te menge suǥù nu.

⁶⁷Hein aney he wazè e pa kenikew mensuwa, ne mid-awà a ziyà te kenikew, piru ǥuntaan midtuman ku en is lalag nu.

⁶⁸Meupiya ka iyan wey meupiya is mibpemeelan nu. Penurua a te menge sulunuzen he ibpesunud nu.

⁶⁹Minsan mibutbutangan a te menge gelbuwen, midtuman ku ǥihapun is menge sulunuzen he ibpesunud nu te ebpuun te tivuuk he ǥehinawa ku.

⁷⁰Heini is menge gelbuwen, kenà sikandan ebpekesavut te kesuǥuan nu. Piru siak, igkelipey ku is kedtuman kayi.

⁷¹Meupiya is kedsilut nu, su pinaaǥi kayi nepenurù a te menge penurù nu.

⁷²Para kediey, is kesuǥuan he imbeǥey nu edhuna pa he mahal te utew zekelà he ketiǥeyunan.

⁷³Midlimbag a wey mibpurma a kenikew; beǥayi a te kedsavut su para meistudyuwi ku is menge suǥù nu.

⁷⁴Egkelipey is menge etew he edtahud kenikew emun egkeehè e zan, su edsarig a te lalag nu.

⁷⁵Netuenan ku, Nengazen, he metazeng is menge suǥù nu. Ne ǥeina te metinumanen ka te egkeǥiyen nu, umbe mibmansu a kenikew.

⁷⁶Berakat he mekeveǥey kedì te kelipey is gaǥew nu su iyan heini insaad nu kedì te suluǥuen nu.

⁷⁷Kehizuwi a su para mebpedayun is kegkeuyag-uyag ku; su igkelipey ku is kedsunud te kesuǥuan nu.

⁷⁸Berakat he mepeel-elezi is menge gelbuwen tenged te kebutbutangi zan kediey. Iyan, siak mulà, egngunngunuen ku is menge sulunuzen he ibpesunud nu.

⁷⁹Berakat he med-uvey kayi te kediey is menge etew he edtahud kenikew wey netau te menge penurù nu.

⁸⁰Berakat he metuman ku te ebpuun te tivuuk he ǥehinawa ku is menge sulunuzen he ibpesunud nu su para kenà a mepeel-elezi.

⁸¹Edarà ad is edtaǥad te kedlibriya nu kedì, piru edsarig a ǥihapun te lalag nu.

⁸²Mibmerusirem en is ked-ehè ku te kedtulung ku kedtaǥad te pesarig nu. Nekeinsà a te, “Keenu e pa vuwa kenikew edlig-eni wey edlipaya?”

⁸³Minsan pa ke neiring ad te lundis he teleǥuey te vinu he wazè din en pulus, wazè ku lipati is menge sulunuzen he ibpesunud nu.

⁸⁴Sengemenu keluǥayad is kebpeketaǥad ku? Keenu nu pa edsiluti is menge etew he mibpesipala kediey te suluǥuen nu?

⁸⁵Mibangbang is menge gelbuwen he wazà medsunud te kesuǥuan nu te para te egkeuluǥan ku.

⁸⁶Egkeseriǥan is langun he menge suǥù nu. Tevangi a, su ebpesipelahan a te menge etew minsan wazà hustu he hinungdan.

⁸⁷Hapit e zan en egkepatey, piru wazè ku engkezi is menge sulunuzen he ibpesunud nu.

⁸⁸Tipiǥi nu is untung ku tenged te ǥaǥew nu; su para mekepedayun a he edtuman te menge penurù nu.

⁸⁹Nengazen, is lalag nu ebpedayun te wazà pidtemanan; melig-en heini iring te langit.

⁹⁰Is kebmetinumanen nu ebpedayun te wazà pidtemanan. Melig-en is kebpelestara nu te kelibutan, umbe kemulu pa heini.

⁹¹Is langun he menge naazen kemulu pa taman en guntaan tenged te iyan suat nu. Su haazà is langun ebpenilbi kenikew.

⁹²Emun wazà mekeveǥey kedì te kelipey is kesuǥuan nu, ne minatey ad pezem geina tenged te menge elentusen ku.

⁹³Kenè ku edlipatan is menge sulunuzen he ibpesunud nu, su pinaaǥi kayi is ked-uy-uyaǥa nu kediey.

⁹⁴Iyan ka teǥiǥaked kedì, umbe libriya a! Su ebpeninguhà a te kedtuman te menge sulunuzen he ibpesunud nu.

⁹⁵Is menge lalung ed-ayan te kedhimatey kedì, piru egngunngunuen ku is menge penurù nu.

⁹⁶Neehè ku he zuen ketepusan te langun he menge naazen, piru is menge suǥù nu, wazè din mulà ketepusan.

⁹⁷Utew zekelà kayi te ǥehinawa ku is kesuǥuan nu; layun ku heini egngunngunua.

⁹⁸Ne ǥeina te layun kayi te kediey is kesuǥuan nu, edhuna a he metau te menge kuntada ku.

⁹⁹Mahabet pa is kedì he nesavut, kenà te menge menunudlù ku, su is menge penurù nu iyan ebpurungan ku ed-is-isipa.

¹⁰⁰Edhuna is kedì he kedsavut te kedsavut te menge meǥurang, su midtuman ku man is menge sulunuzen he ibpesunud nu.

¹⁰¹Midlikayan ku is langun he mezaat he vaal su wey ku metuman is lalag nu.

¹⁰²Wazè ku ewai is menge suǥù nu, su iyan ke man nenurù kayi kediey.

¹⁰³Ke và dà keenen, ne utew meemis is menge saad nu, edhuna pa he meemis te teneb.

¹⁰⁴Nekaangken a te kedsavut he ebpuun diyà te menge sulunuzen he ibpesunud nu, umbe egkeepesan ku is langun he mezaat he vaal.

¹⁰⁵Is lalag nu iring te sulù he ebpeketeyew te ibayè ku.

¹⁰⁶Edtumanen ku iyan is penangdù ku he edsunud a te metazeng he menge suǥù nu.

¹⁰⁷Utew subra is kebpekaantus ku, umbe pekeluǥeyaza nu pa is untung ku, Nengazen, su iyan heini saad nu.

¹⁰⁸Dewata nu, Nengazen, is keugelingen ku he suat te kedalig kenikew, ne penurua a te menge suǥù nu.

¹⁰⁹Minsan pa te layun a edhephepiti te kemetayen, ne wazè ku lipati is kesuǥuan nu.

¹¹⁰Midlitaǥan a te menge lalung, piru wazè ku ewai is menge sulunuzen he ibpesunud nu.

¹¹¹Is menge penurù nu iyan utew mahal he ketiǥeyunan ku te wazà pidtemanan, su iyan heini ebpekeveǥey kedì te kelipey.

¹¹²Midisisyun a he edtumanen ku is menge sulunuzen he ibpesunud nu taman te taman.

¹¹³Egkeepesan ku is menge etew he kenà tinutuuwà is kebpekid-uyun dan kenikew, piru mibmahal ku mulà is kesuǥuan nu.

¹¹⁴Iyan ka elesè ku wey endilungè ku; midsarig a te lalag nu.

¹¹⁵Sikiyu is mezaat is menge vaal, pekeziyui a keniyu, su wey ku metuman is menge suǥù te Megbevayè ku.

¹¹⁶Beǥayi a te zesen su iyan heini saad nu su para mebpedayun is kegkeuyag-uyag ku; ne kenè nu ituǥut he egkaawà is perateng ku.

¹¹⁷Tevangi a su para melibri a; ne layun ku ibpesuǥat is isip ku ziyà te menge sulunuzen he ibpesunud nu.

¹¹⁸Inselikwey nu is langun he midselikwey te menge sulunuzen he ibpesunud nu. Ne tutuu iyan he wazà pulus te kebpenlimbung dan.

¹¹⁹Mid-isip nu he iring te menge besura is langun he lalung he menge etew kayi te kelibutan. Ne tenged kayi mibmahal ku is penurù nu.

¹²⁰Egkerkeren a te kegkahandek kenikew; ingkahandek ku utew is kedhukum nu.

¹²¹Midhimu ku is metazeng wey hustu, umbe kenà a kenikew vey-ani he edezeetan te menge kuntada ku.

¹²²Peseriǥi a he edtevangan a kenikew is suluǥuen nu; kenè nu mehimuwa he edèdaaǥen a te menge gelbuwen.

¹²³Mibmerusirem en is ked-ehè ku te kedtulung ku kedtaǥad te pesarig nu he edlibriyen a kenikew.

¹²⁴Himuwa nu kayi te kedì te suluǥuen nu is baal he tenged te kebmahala nu kedì, ne penurua a te menge sulunuzen he ibpesunud nu.

¹²⁵Suluǥuen a kenikew, umbe beǥayi a te kedsavut su para mesavut ku is menge penurù nu.

¹²⁶Nengazen, ereg ke en he edwaleng guntaan he timpu, su wazè en medtuman is menge etew te kesuǥuan nu.

¹²⁷Tutuu he mibmahal ku is menge suǥù nu lavew pa te vulawan, minsan pa te lunsey he vulawan.

¹²⁸Tutuu he midtuman ku is menge suǥù nu, ne egkeepesan ku is langun he mezaat he vaal.

¹²⁹Utew mekempet is menge penurù nu, umbe midsunud ku heini te kedsunud he ebpuun kayi te tivuuk he ǥehinawa ku.

¹³⁰Is kedseysaya te lalag nu ebpekeveǥey te kerayag diyà te isip te menge etew wey ketau te wazè din ketau.

¹³¹Utew zekelà is kebpengenduya ku te suǥù nu.

¹³²Seǥipaa a wey kehizuwi a, su layun nu heeyan ebeeli ziyà te menge etew he mibmahal kenikew.

¹³³Giyahi a kenikew pinaaǥi te lalag nu; kenè nu mehimuwa he meuwit a te kelelalung.

¹³⁴Libriya a te kedèdaaǥa kedì, su wey ku metuman is menge sulunuzen he ibpesunud nu.

¹³⁵Ipeehè nu kedì te suluǥuen nu is keupiya nu, ne penurua a te menge sulunuzen.