Salmo 119:115-140

¹¹⁵Sikiyu is mezaat is menge vaal, pekeziyui a keniyu, su wey ku metuman is menge suǥù te Megbevayè ku.

¹¹⁶Beǥayi a te zesen su iyan heini saad nu su para mebpedayun is kegkeuyag-uyag ku; ne kenè nu ituǥut he egkaawà is perateng ku.

¹¹⁷Tevangi a su para melibri a; ne layun ku ibpesuǥat is isip ku ziyà te menge sulunuzen he ibpesunud nu.

¹¹⁸Inselikwey nu is langun he midselikwey te menge sulunuzen he ibpesunud nu. Ne tutuu iyan he wazà pulus te kebpenlimbung dan.

¹¹⁹Mid-isip nu he iring te menge besura is langun he lalung he menge etew kayi te kelibutan. Ne tenged kayi mibmahal ku is penurù nu.

¹²⁰Egkerkeren a te kegkahandek kenikew; ingkahandek ku utew is kedhukum nu.

¹²¹Midhimu ku is metazeng wey hustu, umbe kenà a kenikew vey-ani he edezeetan te menge kuntada ku.

¹²²Peseriǥi a he edtevangan a kenikew is suluǥuen nu; kenè nu mehimuwa he edèdaaǥen a te menge gelbuwen.

¹²³Mibmerusirem en is ked-ehè ku te kedtulung ku kedtaǥad te pesarig nu he edlibriyen a kenikew.

¹²⁴Himuwa nu kayi te kedì te suluǥuen nu is baal he tenged te kebmahala nu kedì, ne penurua a te menge sulunuzen he ibpesunud nu.

¹²⁵Suluǥuen a kenikew, umbe beǥayi a te kedsavut su para mesavut ku is menge penurù nu.

¹²⁶Nengazen, ereg ke en he edwaleng guntaan he timpu, su wazè en medtuman is menge etew te kesuǥuan nu.

¹²⁷Tutuu he mibmahal ku is menge suǥù nu lavew pa te vulawan, minsan pa te lunsey he vulawan.

¹²⁸Tutuu he midtuman ku is menge suǥù nu, ne egkeepesan ku is langun he mezaat he vaal.

¹²⁹Utew mekempet is menge penurù nu, umbe midsunud ku heini te kedsunud he ebpuun kayi te tivuuk he ǥehinawa ku.

¹³⁰Is kedseysaya te lalag nu ebpekeveǥey te kerayag diyà te isip te menge etew wey ketau te wazè din ketau.

¹³¹Utew zekelà is kebpengenduya ku te suǥù nu.

¹³²Seǥipaa a wey kehizuwi a, su layun nu heeyan ebeeli ziyà te menge etew he mibmahal kenikew.

¹³³Giyahi a kenikew pinaaǥi te lalag nu; kenè nu mehimuwa he meuwit a te kelelalung.

¹³⁴Libriya a te kedèdaaǥa kedì, su wey ku metuman is menge sulunuzen he ibpesunud nu.

¹³⁵Ipeehè nu kedì te suluǥuen nu is keupiya nu, ne penurua a te menge sulunuzen.

¹³⁶Nekepurung a mekesineǥew su ǥeina te wazà medtuman is menge etew te kesuǥuan nu.

¹³⁷Metazeng ka, Nengazen, wey hustu is menge suǥù nu.

¹³⁸Metazeng wey egkeseriǥan is menge penurù he imbeǥey nu.

¹³⁹Utew subra is pauk ku su ǥeina te mid-iniyuǥan te menge kuntada ku is menge lalag nu.

¹⁴⁰Nepurung en meǥezami he egkeseriǥan iyan is saad nu, ne mibmahal ku heini te suluǥuen nu.