SALAMO 83:1-12

¹Dirava e, basio noho hedavauhe, Dirava e, eremu basio kumaia, Iaḡamu basio ania.

²A itaia, oi inaimu na e heloḡo-heloḡomu, e inai henimumu taudia na e gaga isimu.

³Oiemu bese idoadia daladia e ato hatamu, o reḡudiamu taudia ihadikadia totona e henega boumu.

⁴Idia na e tomu “Aoma, una bese baita habuaia tari, Israel ladana basie laloa tao Iou ela bona hanaihanai”.

⁵Oibe, mai lalodia tamona e henegamu, oi ihadikamu totona e gwau hamata hehenimu.

⁶Taudia bini: Edom bona Ismael iduhudia iboudiai, bona Moab taudia, bona Hagara besena danu;

⁷Gebala bona Amono bona Amalek, bona Filistia bona Turo taudia danu.

⁸Asuria danu idia ida vada e hebou, idia na Lot garana e ima henia heboumu. (Selah)

⁹Midian taudia o kara henidia heḡereḡerena, idia danu unu ba kara henidia toma; eiava Sisera bona Iabin na Kison sinavaina isena ai o kara henidia heḡereḡerena.

¹⁰En-doro ai o habuadia tari, tano seriserina ai o halaodia.

¹¹Edia lohia na Oreb bona Sebe heḡereḡeredia ai ba halaodia, edia pavapava iboudiai na Sebaha bona Salmuna heḡereḡeredia ai.

¹²Idia na eto “Dirava ena rei gabudia na baita abidia iseda”.