SALAMO 79:2-9

²Emu hesiai taudia tau-anidia na atai manudia vada e henidia, adia; emu helaḡa taudia hidiodia na tanobada boromadia vada e henidia.

³Raradia vada e hahebubua, ranu heḡereḡerena, Ierusalem heḡeḡemadai ai, asi tauna ta noho, idia baine guridia.

⁴Dekemai taudia ese e ihi-ihiraimaimu, e ḡeḡemai daemu taudia ese e ḡonaḡonalaimaimu, bona e kirikirilaimaimu.

⁵Iehova e, ba badu henimai ela bona edena nega ai? Ela hanaihanai a? Emu vaḡeḡe baine ara lahi na heto a?

⁶Asia dibamu besedia latadiai emu badu ba seia dobi, oi ladamu asie hahaneamu basileiadia latadiai danu;

⁷badina be idia ese Iakob vada e ania ore, ena noho gabuna vada e havahua.

⁸Senemai edia kara havara na basio lalo tao, ai ihadikalaimai; emu hebogahisi baine mai henimai haraḡa, badina be ai na vada ame baia.

⁹Ihamaurimai Diravana e, ba kahamai, oi ladamu hairaina bagunai; ba hamaurimai bona emai dika ba gwau tao, oi ladamu dainai.