SALAMO 78:1-29

¹Egu orea taumui e, egu hahediba herevadia a kamonai, taiamui a hakala, lau udugu herevadia a kamonai.

²Sivarai heḡereḡerena ta baina gwauraia, sene herevadia hehunidia;

³ai a kamonai bona dibamai, tamamai ese vada e hamaoromai ḡaudia, baina gwaurai.

⁴Besedia edia amo basia hunidia, a Iehova ena kara herea-daedia bona ena goada, bona hoa karadia ia ese vada e kara, uru gabena taudia baia hamaorolaidia.

⁵Ia ese haheḡani e atoa Iakob ena, bona taravatu na Israel e henia. Bena seneda e haḡanidia, idia ese natudia bae hadibadia eto;

⁶uru gabena taudia bae diba totona, do asie vara memerodia danu; bena idia na bae tore isi, natudia ma bae hamaorolaidia.

⁷Unu amo Dirava bae laroa, bona Dirava ena ḡaukara basie laloa boio, a ena haheḡani bae badinadia.

⁸Unu amo danu tamadia ida basie heḡereḡere: lalo-auka bona gwau-edeede uruna bunai, lalodia asie hadai maoromaoro uruna, laumadia ese Dirava asie badinaia.

⁹Efraim taudia mai edia peva na tuari dinana ai e lou.

¹⁰Dirava ena gwauhamata asie badinaia, bona ena taravatu irakalaina e dadaraia.

¹¹E kara ḡaudia e lalodia boio, bona ena hoa karadia e hahedinaraiva ḡaudia danu.

¹²Senedia vairadiai ia ese hoa karadia e kara, Aigupto tanona ai bona Soan taorana ai.

¹³Davara e hapararaia, bena idia ese e rakaia hanai, ranu na e haginia tao, senu ta na heto.

¹⁴Dina ai ia ese ori dubuna amo e hakaudia, bona hanuaboi idoinai lahi mamana amo.

¹⁵Tano ḡaḡaena ai nadi e hapararadia, inuinu ranuna momo e henidia, ranu dobuna heḡereḡerena.

¹⁶Ranu na nadi amo e ha-arua lasi, ranu na e aru dobi, sinavai na heheto.

¹⁷Ḡau tamona idia ese edia kara havara e habadaia ienai, tano ḡaḡaena ai Herea Mikamika e gwau edeede henia.

¹⁸Lalodia ai Dirava e tohoa, edia ura anianidia e gwaurai;

¹⁹Dirava e ihi-ihiraia, eto “Tano gaḡaena ai Dirava ese aniani baine dabaraia a?

²⁰Ia ese nadi e botaia, bena ranu e aru lasi, koupa-koupa e aru rohoroho; a aniani danu baine heni diba, eiava vamu na ena orea taudia baine henidia diba a?”

²¹Taunabunai Iehova e kamonai negana ai na e badu dikadika, Iahi e ara Iakob enai, ena badu e ḡaraḡara Israel enai;

²²badina be Dirava asie abiabiraia, ena hahemauri siahuna asie abidadama henia.

²³Ḡau tamona, ia ese guba atai ai e haḡanidia, bona guba iduaradia e kehodia;

²⁴mana na latadiai e hadihoa medu na heto, adia, guba anianidia e henidia.

²⁵Taunimanima ese aneru adia aniani e aniva; ia na aniani momo e siaia, adia.

²⁶Guba ai lai mairiveina e toa, ena hahedua dainai, ena siahu amo lai diho e hakaua lasi;

²⁷vamu na latadiai e hadihoa gahu na heto, roho manudia e hadihodia kone mirina na heto;

²⁸ia ese e hamorudia edia taruha bogaraginai, edia noho gabudia heḡeḡemadai.

²⁹Idia na e aniani, bogadia e kunu; e gadodiava ai e urava ḡaudia na e henidia.