SALAMO 49:11-19

¹¹Ena be tano haida e gwauraidia edia, to edia guri na edia ruma ela bona hanaihanai, edia noho gabudia ela bona uru iboudiai.

¹²Tau ta na ena hairai ai basine noho diba, ia na e masemu boromadia na heheto.

¹³E heaḡi kavamu taudia davadia binai, ahudia e moalelaimu taudia dokodia binai.

¹⁴Mamoe na heheto mase gabuna baela; mase ese baine regudia, mamoe iregudia tauna na heto. Maoromaoro guri ai e dihomu, hairaidia vada bae ore, mase taudia edia gabu ai bae noho.

¹⁵A Dirava ese lau laumagu davana baine karaia, mase siahuna amo baine rauaia; badina be ia ese baine abigu dae. (Selah)

¹⁶Tau ta baine taḡa negana ai, bona ena ruma hairaina baine bada negana ai, basio gari.

¹⁷Badina be baine mase negana ai ḡau ta basine abia kau, basine laohaia; ia hairaina basine diholaia.

¹⁸Ena be ena mauri dinadia ai ia na sibona moale tauna ai baine hegwaurai, ena be sibona ena namo e havaraiamu tauna na bae imodaia,

¹⁹to tamana ena uru taudia baine lao henidia; idia ese diari basie itaia lou.