SALAMO 40:1-17

¹Iehova na nariava mai haheaukagu ida; ia ese e igo diho henigu, egu taitai e kamonai.

²Ia ese guri dikana amo e verigu lasi, kopukopu gabuna amo e abigu isi; aegu na nadi badana latanai e atodia kau, egu raka e reḡua.

³Ia ese ane matamata na udugu ai e atoa, eda Dirava ihanamolaina anena. Hutuma bae itaia, bena bae gari, bona Iehova bae abidadama henia.

⁴Iehova e abidadama heniamu tauna na namo; ia ese heaḡi taudia se matauraidiamu, bona dirava koikoidia ilao-henidia totona e raka sirimu taudia se haḡerediamu.

⁵Iehova e, egu Dirava, emu hoa karadia bona ilalolaimai lalo-hadaidia vada o habada emai ai; oi na asi idaimu. Bama gwauraidia bona bama herevalaidia, to basinama duahidia diba.

⁶Rara boubouna bona flaoa boubouna na so uramu, a taiagu vada o hakiraradia. Ḡole-oho boubouna bona kara-dika boubouna oi ese so gwauraimu.

⁷Bena lau nato “A itaia, na vasimu, buka ilokuna ta ai vada e torelaigu:

⁸egu Dirava e, oiemu ura ikarana na moalelaiamu, oiemu taravatu na lalogu ai e miamu”.

⁹Hahemauri sivaraina namona vada na gwauraia, hebou badana lalonai; Iehova e, oi dibamu, bibinagu asina hakapudia.

¹⁰Oiemu kara maoromaoro na lalogu ai asina hunia, emu heabidadama bona emu hahemauri vada na herevalaidia; emu hebogahisi bona emu hereva momokani na hebou badana amo asina hunia.

¹¹Iehova e, emu hebogahisi na egu amo basio rua; emu lalokau bona emu heabidadama ese bae reḡugu hanaihanai.

¹²Badina be hahedika momo herea vada e ḡeḡegu ahu, egu kara havara ese vada e lasigu tao, asi egu dala baina gaga isi; idia na momo herea, kwaragu huidia na dia hoho; daragu na e dokomu.

¹³Iehova e, mani emu kara ba hamaurigu, Iehova e, ba durugu haraḡa.

¹⁴Egu mauri iabi ohona dalana e tahuamu taudia na ba hahemaraidia bona ba haheḡonudia; ihahisigu e uramu taudia na ba haloudia bona ba hahemaraidia;

¹⁵e gwau henigumu, e tomu “Aha, aha”, taudia na edia hemarai dainai bae kudou hetaha.

¹⁶A e tahumumu taudia iboudiai na bae moale, oi bae moalelaimu. Emu hahemauri e ura heniamu taudia bae hereva loulou, baeto “Iehova na herea dae”.

¹⁷Lau be na ogoḡamimu bona na dabumu, A Ḡaubada ese e lalogumu. Dirava e, basio halahe; oi na lau ikahagu bona lau ihamaurigu Diravana.