Salmo 40:1-17

¹Inanosak ay sinsin-ed din badang Diyos Apo, inmosdong et dinnge na din kararag ko.

²Inmisalakan sin kaeegyat ay bito ay naikosnongak ay kad-an di pitek ay nailemlemak. Inmipatang sin dakdake ay bato, et mandanak ay magay egyat ko.

³Baro ay kanta di initdo na ta ikansiyon ko. Panangdayaw en sisya ay Diyos tako. Ad-adon to di makaila et emegyat da ya mantalek dan sisya.

⁴Nagasat din mantalek en Diyos ay adi masangaw ay makidayaw si sinan didiyos.

⁵Magay makaison sik-a, Yahweh ay Diyos mi. Nakaskasdaaw din inam-amag mo para en dakami, et siya abe sin planom paran dakami. Adiak makaibaga mo dad-atek amin dana, tan palalo ay ad-ado da.

⁶Baken din napalpalti ay animal ya odom ay daton di laylaydem. Baken abe din kapopooan di animal ya odom ay daton para sin basbasol di panragragsakam. Ngem indawat mo din ingak ay mannge sin ibagam.

⁷Et naeyak ay Diyos ay manongpal sin laydem ay kaman din inpaisolat mo sin nalopilop ay libro maipanggep en sak-en.

⁸Laydelaydek ay onodan din laydem ay Diyos ko. Kanayon ay nemnemek din linteg mo.

⁹Inpaammok din kosto sin gimong di am-in ay ipogaw mo, adiak met ginmiginek et ammom ay Diyos Apo.

¹⁰Magay binokbokodak, kanayon ay dinad-at ko din omiparagsak ay pangisalakanam ya kinamatalek mo, siya abe sin adi manbalbaliw ay layad ya seg-ang mo.

¹¹Din seg-ang mon sak-en, mantoltoloy koma. Kanayon koma ay somalaknib ka, begew sin komakaman ay layad mo ya din kinamatalek mo.

¹²Tan nanliniked nan problemak, palalo ay ad-ado. Adiak makaila tan kaman tomab-ok nan basbasol ko, ad-ado da mo din kabibilang di book ko, et enggay nakaan di toled ko.

¹³Apo Diyos, pangaasim koma ta dalasem ay omisalakan ka.

¹⁴Sapay koma ta maabak ya maibabain da din manpanggep isnan biyag ko ya malaydan sin ligat ko.

¹⁵Din lomaslasoy, maibabain da koma begew sin kaabakan da.

¹⁶Ngem din mangan-anap en sik-a, sapay koma ta manragsak da. Amin ay man-iyaman sin panangisalakan mo, kanayon koma ay kanan da, “Nangatongato si Diyos Apo.”

¹⁷Kaseseg-angak ay nabiteg kayman, ngem adi ka met lomiwliw-an. Diyos ko ay omisalakan, dalasem koma ay bomadang.