SALAMO 35:7-25

⁷Badina be lau iabigu totona edia huo e otoa, asi badina; asi badina guri e ḡeia, egu mauri iabi-ohona.

⁸Mase ese baine hahoadia; e otoa huona ese baine hatoadia, ia lalonai vada bae mase.

⁹Una negana ai laumagu ese Iehova baine moalelaia; ena hahemauri baine imodaia.

¹⁰Turiagu iboudiai baeto “Iehova e, daika na oi heḡereḡeremu? Oi ese manoka tauna o hamauriamu, goada ai e hereaiamu tauna imana amo; bona manoka tauna bona ogoḡami tauna ena kohu e dadihaiamu tauna imana amo”.

¹¹Hahebade koikoi taudia e tore isimu, asi dibagu ḡaudia e nanadailaigumu.

¹²Na kara namo henidia davana na e kara dika henigumu; laumagu na e dauremu.

¹³A lau be e goreredia negana ai na guma dabuadia na dokilai, bona anivaga ai sibogu na hahedika;

¹⁴na ḡuriḡuri igo-diho, turagu eiava tadikakagu taina bama tai na heto; na loa eva-eva, sinana e tailaiamu tauna na heto, na igo diho, na tai noho tai noho.

¹⁵A lau na hekwakwanai negana ai na idia na e moale hebouva, lau ihadikagu totona e hegogova; idau taudia, asi dibagu taudia, na lau ihadikagu totona e hebouva, e ihi-ihiraiguva asi dokona.

¹⁶Dirava asie matauraiava taudia ese e hevaseha henigu loulouva, gadigadidia e hahedai heniguva.

¹⁷Ḡaubada e, ba herarai tao ela bona edena nega ai? Laumagu na edia ala-ala amo ba hamauria, egu mauri na leona edia amo ba rauaia;

¹⁸bena hebou badana lalonai baina hanamomu, hutuma bada bogaragidiai baina imodaimu.

¹⁹Ba durugu, e inai henigu koikoimu taudia ese basie kirikirilaigu, e inai henigu kavamu taudia ese ibunidia basie ha-roro.

²⁰Badina be maino herevadia asie gwauraimu, a tano ai e noho mainomu taudia latadiai na koikoi herevadia e gwauraimu.

²¹Ududia e ahagamu, lau ihadikagu, e tomu “Aha, aha, matamai ese vada e itaia”.

²²Iehova e, vada o itaia; udumu basio hakapua; Iehova e, dahu ai basio noho.

²³Legamu a gadaia, lau ihahemaoro-henigu totona a noga; egu Dirava, egu Ḡaubada, lau ihamaoromaorogu totona a noga.

²⁴Iehova e, egu Dirava, a gvauraigu maoro, oiemu kara maoromaoro heḡereḡerena; bona ba laodia ahu, basie kirikirilaigu.

²⁵Idia na basie hereva heheni, basieto “Aha, eda ura vada ta abia;” ma basieto “Ita ese vada ta hadonoa”.