SALAMO 35:7-25

⁷Badina be lau do idia abia totona, tarapu idia atoa, badina ta lasi, bona guri badana idia geia, lau do idia hamorua totona, badina ta lasi.

⁸To mase ese, hoa kara bamona, do ia abidia haraga. Idia sibodia edia tarapu lalonai do idia moru, bona unai tarapu lalonai do idia mase!

⁹Unai neganai Lohiabada dainai do lau moale, bona ia ese lau ia hamauria dainai do lau moale bada.

¹⁰Egu kudouna ibounai dekena amo, lau ese Lohiabada do lau hamaoroa, do lau gwau, “Lohiabada e, oi hegeregerena ta ia noho lasi. Oi ese manoka taudia oi durua noho, vadaeni goada taudia ese idia hadikadia diba lasi. Oi ese dagedage taudia dekena amo ogogami taudia oi hamauria noho.”

¹¹Samania koikoi taudia idia toreisi noho, lau karaia lasi kerere totona, lau idia samania noho.

¹²Lau ese idia dekenai kara namo lau karaia, to ena davana be lau dekenai kara dika idia karaia, vadaeni egu lauma be ia hisihisi noho.

¹³Guna unai taudia idia gorere neganai, puse dabua lau atoa, egu lalohisihisi ena toana, bona aniani lau ania lasi. Ma egu kwarana lau atoa diho, idia totona lau guriguri.

¹⁴Mai bogahisihisi danu lau guriguri, egu turana o egu tadikakana totona do lau guriguri hegeregerena. Mai lalohisihisi danu egu kwarana lau atoa diho, iena sinana totona ia taitai tauna bamona. Lau loaloa kahana kahana dekenai, lau tai noho, tai noho.

¹⁵To lau ese hisihisi lau davaria neganai, idia ibounai idia moale hebou, bona lau do idia hadikaia totona idia haboua. Idau taudia, lau diba lasi taudia, ese lau idia hereva dika henia. Egu ladana hadikaia hereva idia hadokoa lasi.

¹⁶Aena ia dika tauna idia kirikirilaia taudia edia kara bamona, idia ese mai badu danu, lau dekenai edia isena idia koria auka masemase.

¹⁷Lohiabada e, edia kara do oi itaia noho sibona ela bona edena negai? Unai tau dikadia edia kara dika dekena amo lau do oi hamauria. Inai laiona dekena amo, lau do oi veria mauri.

¹⁸Unai neganai hebou badana lalonai, oi do lau tanikiu henia. Taunimanima momo edia vairana dekenai oi do lau hanamoa bada.

¹⁹Lau do oi durua, vadaeni lau idia hadikaia gwauraia taudia, unai koikoi taudia ese, lau do idia kirikirilaia lasi, bona lau idia badu henia kava taudia ese, egu lalohisihisi dekenai do idia hevaseha lasi.

²⁰Badina be maino hereva idia gwauraia lasi, to maino dekenai idia noho taudia namodia, edia latanai be koikoi herevadia idia gwauraia noho.

²¹Idia ese danu lau idia samania noho, idia boiboi, idia gwau, “Ai ese oiemu kara ai itaia vadaeni.”

²²Lohiabada e, oi ese inai edia kara oi itaia vadaeni. Unai dainai oiemu uduna do oi hakapua lasi. Lohiabada e, gabu daudau dekenai do oi noho lasi!

²³Do oi noga, bona kota maoromaoro lau dekenai do oi henia. Egu Dirava, egu Lohiabada e, do oi toreisi, bona egu kara maoromaoro do oi gwauraia.

²⁴Lohiabada e, oi be maoromaoro momokani, unai dainai lau do oi gwauraia kerere lasi! Lau idia hadikaia gwauraia taudia do oi koua, vadaeni lau do idia kirikirilaia lasi.

²⁵Vadaeni idia be inai bamona do idia herevahereva lasi, do idia gwau lasi, “Namo bada herea, iseda ura ita abia vadaeni! Ita ese unai tau ita hadikaia ore vadaeni!”