Salamo 25:2-22

²Egu Eaubada e, egu sunuma ea tore’esegai oa arim eai, tabu se hetaumaeamaeagu agu waiunuyao tabu se saepoigu.

³Hedeomi, eai to eai se bagibagilaoa oa arim eai taba nige se taumaeamaea, na isi mo dodoga manamanabaradi i lolo isi se hetaumaeamaeadi.

⁴GUIAU e, em laulau bena u heitagu; em dobila bena u heatagu.

⁵Em riba mamohoina bena arinai u woeaigu, eo u heatagu, paana oa egu mauri Eaubadana ede. Asubena lohaloha eai oa ea bagibagiem.

⁶GUIAU e, em nuatoatoa tabu u nuahuiei, eo em gadosisi miatahitahina, mumuga eai ie mia i lau e nige nosina.

⁷Hewarigu laulaudi baabaaeadi tabu u henuaisinidi, e egu awayagara; oa em gadosisi miatahitahina mo arinai abo u nuatuigu, em abilolo debana eai, GUIAU e!

⁸GUIAU i lolo eo i dudurai; arinai tatao baabaaeadi dobila i heitadi.

⁹Tau nuatudobidobiuioina dobila duduraina arinai i woeai, eo tau nuatudobidobiuioina ia ena eda i heata.

¹⁰GUIAU ena abiabi gamagaridi aridi eai gadosisi miatahitahina eo riba hemamohoiena i hemasarahadi, isi, eai to eai ena ribahesunuma eo ena riba tabudi se sogohididinidi.

¹¹Oa esam debana eai, GUIAU e, egu baaea giruna bena u ribagigiri, paana ie lai.

¹²Aitea tau ia GUIAU i matausiei? ia abo i heata aisega dobila bena i hineri.

¹³Ia abo i mia komakomani, taba nige saha i deha, eo nanatunayao edi tano abo se abi isi enadi.

¹⁴GUIAU ena awa’eha i mosei isi ia se matausiei aridi eai ena ribahesunuma hinage i hemasaraha aridi eai.

¹⁵Matagu huia gamagari ea tusaei GUIAU arinai, aegu sai’i eai abo i abihaidi.

¹⁶U sinibuima, eo u nuatoatoaegu, paana ede eaubom, nige agu sagu, eo ea amnabaaea.

¹⁷Nuagu ena amamna bena u laehesuara eo egu nuadubu eai bena u abiisinigu.

¹⁸Egu nuadubu eo agu iwala bena u nuatui, eo egu baaea gamagamagaridi bena u ribagigiridi.

¹⁹Agu waiunu gamagamagaridi bena u nuatuidi, edi hewaiunu hinage arigu eai i karapi ariri.

²⁰Nuagu u itawatai, eo u saguhaigu; tabu se hetaumaeamaeagu, paana egu abadago ede oa.

²¹Egu miamia a’a eo egu laulau dudurai bena se ganaganaigu, paana ea bagibagilaoa oa arim eai.

²²GUIAU e, Isaraela ena lauita gamagaridi aridi eai oa bena u unehai.