Buka Linge 25:2-22

²Nigua na God, inau tu varava itamua! Ko bei lubatiu ge ku maa, mo ko bei lubatira na ghagua na levunimate kara nia rivurivu na lagavuleagu.

³Gaira tara varava itamua kara mua nia ma siki totobo, gaira vamua tara nia lutu na kiko kara maa.

⁴Tughunia vaniu na halautu ku liu ga, Ghe Lord; Tuhua vaniu na halautu maemane ku taonia.

⁵uhuliu nia nimua na utuni mo ko taraiu na pukuna ighoe na God to vavolau. Inau tu talua nigua na ghanaghana kodo itamua tana dani udolu.

⁶Ko ghanaghanaa, Ghe Lord, nimua na dolo mana veiarovi te mua soko buto, to tatea vanira mai tua na lei vavata idania.

⁷Ko talukehai na lei palugu vuivuni tana pileagu mai; taonia nimua na dolo ko ghanaghanau na pukuna ighoe to veiarovi, Ghe Lord.

⁸a Lord te uto te gonighi na lei totobo maemane me taraira tara tangohahi nia na halautuna.

⁹Gaia te uhulira nia na hava e maemane tara talumuri, me taraira nia na halautuna.

¹⁰na lei halautuna Lord tara dolo mara utuni, vanira rahei tara righitaonia na hava te liona ta nina baubahu.

¹¹Na talumava vania na ahamu, “Ghe Lord, Ko talukehai na lei palugu tara subo ngangata.

¹²Ahei gaira tara mataghunia Lord? Gaia ke tuhua vanira na halautu te vilia vanira.

¹³Gaira kara kabu tana lei lologho sule tana lei bongidira, mana lei daledira ghua kara lologho tana komu baubahu.

¹⁴Na tamakulani kolua Lord te kabu dila vanira rahei tara mataghunia gaia. Gaia te tatea vanira nina baubahu te talu polo dilaa.

¹⁵Na matagu te righia haia va Lord ge ke hangau. Na pukuna gaia vamua ke tangomana na vavolaagu, ta didira na taripiti na ghagua na levunimate.

¹⁶Ririu vaniu mai mo ko aroviu, na pukuna inau heghegu ilokana na vahaghitaili sule.

¹⁷Na lei gunaguna tana tobagu tara subo mara dika va, Ko aroviu ta nigua na dikalio te vahaghitailiu.

¹⁸Righighi nigua na vahaghitaili mana gunaguna, ko talukehai na lei palugu.

¹⁹Righia na subodira na ghagua na levunimate, ra niu sika mara niu ghighirou.

²⁰Righitaonia na volagu mo ko vavolau; ko bei lubatiu gea ge ku maa, na pukuna inau tu varava itamua.

²¹Lubatia na kabu marabu ke pilupungisiu, na pukuna inau tu talua nigua na ghanaghana dila itamua.

²²Huiolia Israel Ghe God, ta nina na lei gunaguna.