Y Salmo Sija 25:2-22

²O Yuusso, iyajago nae juangocoyo: chamo yo munamamamajlao; chamo pumopolo y enimigujo na ugana gui jilojo.

³Magajet, na todo y mumananggajao ti ufanmamajlao: sija ufanmamajlao ni y chumogüe dinague sin jafa.

⁴Y chalanmo, O Jeova, fanueyo; fanagüe yo, ni y chalanmo.

⁵Osgaejonyo gui minagajetmo ya unfanagüeyo; sa jago y Yuus ni y satbasionjo: iyajago nae jufannangga todotdia.

⁶Jaso, O Jeova, y mauleg na minaasemo; yan y mauleg na güinaeyamo, sa sija guinin apmam na tiempo.

⁷Chamo jumajaso y isao y pinatgonjo, ni y quinebrantaco ni y tinago: segun y güinaeyamo jasoyo, pot y minauleg y naanmo, O Jeova.

⁸Mauleg yan tunas si Jeova: pot enao na jafanagüe y maniisao ni y chalan.

⁹Y manmanso ufanfinanagüe gui juisio: yan y manmanso ufanguinia gui chalan.

¹⁰Todo y chalan Jeova güinaeya yan minagajet ni y ayo y umadadaje y tratuña yan y testimoniuña.

¹¹Pot y naanmo, O Jeova, asie y isaojo sa gosdangculo.

¹²Jaye ayo na taotao y maañao as Jeova? güiya ufinanagüe ni y chalan mano y inayegña.

¹³Y antiña usaga gui mauleg: ya y semiyaña uereda y tano.

¹⁴Y secreton Jeova gaegue guiya sija y mumaañaogüe güe; ya güiya ufanagüe sija ni y tratuña.

¹⁵Y atadogjo siempre juatan si Jeova; sa güiya ujala y adengjo juyong gui laso.

¹⁶Atanyo, ya gaease ni guajo: sa guajo taeconsueloyo yan piniteyo.

¹⁷Y chinatsagan y corasonjo lumalamegae: najuyongyo gui pinitijo.

¹⁸Atan y trinesteco yan y pinitijo; ya unasie todo y isaojo.

¹⁹Atan y enimigujo, sa sija manmegae, ya sija chumatliiyo ni y fejman na chinatlie.

²⁰Adaje y antijo ya nalibreyo: ya chajo mamamajlao, sa iyajago nae juangocoyo.

²¹Y minauleg yan y tininas juadádajeyo: sa jago junanangga.

²²Nalibre, O Yuus, y iya Israel gui todo y chinatsagaña.