Godigo Nogi Ugwaba Sabo Tęąbi Po Wabo Buku Dabe 25:2-22

²Nage eno God da, tama eno konealubo homu nageba naga dąų wabo da. Nago ena tau sao. Tiyu, eno konealubo po odolali elama, tama ena hale idalio. Nago te boi bidi dabego ena aiyaba elalumainu elama, tama augwaligo ena kęnę po omainu me igio.

³Awe, nageba te konealubo homu ąų wabo bidi dabe, te augwaligo konealubo odolali dąų omainu elama, tama me tagaliyu me egobeo. Menio. Te nageba hagoma polo ebo bidi dabe, augwali naga te dwai dene somainu elama, tama augwa yali kolesagade hale yaibao.

⁴God, nago te naga kolesaga enaba ola menama, tama nago sunumi enaba ola mao.

⁵Te nago po mu eno wali pomainu ola mao, magi baso meni, nage te eno God dao, tama nago ena ma sabo dao. Te tigidali sogo nago ena tau somainu tonalubo dao.

⁶Genuai Bidi, nago te naga olo mu tau sabo wiegi yai kolesaga, me homu dene ebo kolesaga te homu kone palao. Nago te kolesaga da dali ebo te polobadu digi yali te ela asudubadi, megi sogoba usu nagasobao.

⁷Genuai Bidi, nago eno dwai sęgę sali, me dwai sę yali kolesagade homu kone me palamuo, te ena gesi bidide te sę yali. Nage te da godolo ebo Genuai Bidi God dao, tama nage te sesemane wiegi yai elalubo da. Nago enade homu koneama, tama nago ena te olo mu tau sabo wiegi yai kolesaga yao.

⁸Genuai Bidi te wiegi yai elama, tama agai te po tų sesemane dolo naga ebo dao. Tama tiyu, agai te dwai sęgę sabo bidi dabeba te agai wei eyu, godolo homu yabo kolesaga wali pomainu ola mabo dao.

⁹Te aga dologode bidibo bidi dabe te bilibo dodolaibao, tama augwa te doloba pai kolesaga wali pomainu ebo dao. Agai te aga sunumi me te augwaliba ola mabo dao.

¹⁰Godigo te agai da dali dąų wali po, me bomai po te wali pabo we bidi tigidaliba te agai homu kęą peyu, godolo mu ebo dao. Tama agai homu me hasegeliyu me egobeo.

¹¹God, nago te naga dąų wali po wali peyu, tama eno yali dwai sę hauwa sela sąyao. Nago eno yali dwai sę tigidali sela sąbaso, tama eno nago nogi ugwaba saibao.

¹²Te Genuai Bidigo po wali mu pabo we bidi, te Godigo augwaliba wiegi yai sunumi ola mayu, tama augwali te sunumidu pomainu tebo dao.

¹³Te tobage bidi dabe augwali da te wiegi yai mu bidaibao, tama augwa wai dabe me te tǫde bugagia bididuaibao.

¹⁴Genuai Bidi God aga te aga dologode bidibo we bidi dabe augwaligo abagi mu dao, tama augwali dali te dąų wali bomai po kontrak te augwaliba ma ola mabo dao.

¹⁵Tigidali sogo te Genuai Bidigo ena tau somainu tonalubo da. Magi baso meni, te ena dolainu yali nai dabede te agai ena ma sabo dao.

¹⁶Genuai Bidi, eno homugo nage ena ma aselama, tama nago te olo tau sabo wiegi yai kolesaga enaba yao, magi baso meni, enaduba deli tama eno bomo silalio.

¹⁷Nago eno haliga sęgę elalubo tigidali sela sąyao, tama eno haliga te nagame yai dua bidimainu yao. Nago ena tau selama, tama te sęgę dabego ena elalumainu me egobeo.

¹⁸Nago enade te haliga sęgę, me haliga dene ebo tigidalide nago homu kone palama, tama nago eno sęgę tigidali sela sąyao.

¹⁹Nago te eno boi bidi dabe subao, augwali te hauwa mu tama. Augwaligo ena dali sębę mu genuai ebao.

²⁰Nago ena ma selama, tama ena bugagia seselaluao, tama te boi bidi dabego ena me dologobeo. Nago ena tonalumainu eyu, te ena nageba asobao.

²¹Eno konealubo homu nageba elalubao, tama tiyu, nago eno te tigidali wiegi yai doloba pai kolesaga emainu eyu, tego te sesemane sogo ena tonalumainu ilao.

²²God, nago te naga we bidi tigidali ma dobola sao. Tama te tigidali haniani sęgęgo augwali aiyaba elalumainu me elamu dao.