Salamo 139:4-15

⁴Sora nige riba esau memenagu eai, na oa, GUIAU e, abina u ata heohiyao.

⁵Oa u bagubagunaegu, eo u murimuritaegu, eo oa nimam u toresaei eau potagu eai.

⁶Sonoga meta doha no’ona nige gonoagu; i sae ariri, eau taba nige ea lage arinai.

⁷Oa Earuam ea dagogabaei abo ea lau haedi? E oa matam abo edohana egu dagodagogabaena?

⁸Eau taba ea sae galewa eai, oa nei eai! Taba Hade eai egu eba ea wese na oa hinage nei eai!

⁹Taba maratomtom mabena ea abi abo ea loi ea lau gabogabo sigana eai ea mia,

¹⁰nei eai hinage oa nimam abo i woeaigu, eo nimatutum abo i abididinigu.

¹¹Ena ea ene, “Masigiri taba i bubulitawaigu, eo mara arigu eai i hemala maiona,”

¹²taiede masigiri oa arim eai nige i masigiri, maiona ie mara doha asubena; paana masigiri gonogonoana doha mara oa matam eai.

¹³Taugu boeana oa u ginauri, sinagu bogana eai eaugu gamagaridi oa u hepatuesegaidi.

¹⁴Ea hedebasaem, paana oa u nuamatamatausi eo oa no’ono’om. Nimam ginauridi hinage no’ono’odi. Oa abigu u ata ariri!

¹⁵Taugu nige i otayamui oa arim eai, huiana wa eamuyamui eai se ginaurigu, tano boeana eai se ginauri komakomanigu.