SALAMO 139:3-22

³Egu raka o itaia taomu, egu hekure diho danu; egu kara iboudiai na oi dibamu.

⁴Malagu ese hereva ta do se gwauraia negana ai, Iehova e, una hereva na vada o diba vaitani.

⁵Oi ese o gunalaigumu, o gabelaigumu, imamu na latagu ai vada o atoa kau.

⁶Aonega enehetomana na hoalaia badamu; ia na atai ai, idavarina na asi dibagu.

⁷Oi Laumamu ena amo lau ede bainala? Oi vairamu ena amo lau ede baina heau henia?

⁸Guba ai bama dae, to oi na unuseni ai; mase taudia edia gabu ai egu geda bama lahaia, ai danu.

⁹Daba hanina bama abi, bama roho lao, gadobada daudauna ai bama hanoho,

¹⁰unuseni ai danu oi imamu ese bema hakaugu, oi imamu idibana ese bema dogogu tao.

¹¹Bama toma “Dibura ese baine gorugu ahu, bona e ḡeḡegu daemu diarina na baine dibura”;

¹²to, dibura na dia dibura oiemu ai, hanuaboi eme diari dina heḡereḡerena; badina be dibura bona diari na heḡereḡere oiemu ai.

¹³Oi ese taugu anina o karaia, sinagu bogana ai o karagu.

¹⁴Na imodaimumu, badina be oi na mai garimu bona mai hoamu; emu kara na hoa ḡaudia. Oi na dibamu herea lau;

¹⁵gabu hehunina ai taugu e hekara; tanobada ena dobu gabudia ai e hekara ḡoevaḡoeva negana ai, taugu anitarana na emu amo se hehuni.

¹⁶Tau-anigu na do asi oromana negana ai, oi matamu ese e itagu; dina o karadia egu na iboudiai emu buka ai vada e tore, ta do se vara negana ai.

¹⁷Dirava e, emu lalo-hadai na ḡoeva-dae egu ai, idia na daka hutuma;

¹⁸bama duahidia, idia na miri na heto. Na nogamu negana ai, lau na doini oi ida.

¹⁹Dirava e, kara dika taudia boma aladia mase bema namo; bona rara ihahebubuna e uramu taudia bema rakatanigu danu bema namo;

²⁰idia ese e gwau edeede henimumu mai daḡedaḡedia ida, idia ese e inai henimumu, bae hadikamu totona.

²¹Iehova e, e inai henimumu taudia na na inai henidiamu ani? e daḡedaḡe henimumu taudia na na badu henidiamu ani?

²²Na inai henidia lalo dikamu; idia na lau inaigu na tomamu.