Godigo Nogi Ugwaba Sabo Tęąbi Po Wabo Buku Dabe 139:3-22

³Nago ena te sę ebadi, me te godege pibo sogo, te subo dao. Nago eno kolesaga tigidali koneanio.

⁴Tama eno te po me deli wainu ebaso da, nago te po polo koneanio.

⁵Nago ena tigidali mu bagua selama, tama te nago bomogo te nago ena tonalubo dao.

⁶Nago te koneani homu kolesaga te ena daide ugwanu mu elalu, tama eno homu kolesaga te aiyaba elaluai dao.

⁷Te ena menaba peyu, tama eno te nago hoboludu ogwa wai taga pogowe? Tama ena menaba wi pelama, te nagede geme duala sigi paibawe? Woo, te duala sigi pabo bulu menio.

⁸Ma, te ena dagaluba ugwaba holama, bidainu ebaso, nage te dagalude bidibao. Ma, ena te isali bidi dabego pesageba bidigi pobaso da, nage te bulude me bidibao.

⁹Te ena te giliga pedalubo badu te digibulu bola pigi sogo da, ma ena te giliga dega sigilubo badu digibulu bidigi peyu da,

¹⁰teda nage te pesagede me bidiyu, te ena bilibode te sągą dodolu, tama te ena tau sigi dao.

¹¹Tama eno te po weyu, “Te hulia sabogo ena geme duala sao,” po obaso, “tama te giliga ulago ena bagua selama, te hulia somainu yao,”

¹²tiali goli, tagalao, te nago gedude te be hulia sabo te be mu hulia sabo tiwai egobeo. Tama hulide te ula mu eyu, te giliga ula tiwai yaibao. Be hulibo, me be posobo, te nago gedude te deli tigi tiwai naga dao.

¹³Nago eno tigi pedai tigidali badu nigali. Nago ena tigidali te idago haliga tomode nigai dao.

¹⁴Ena nagede wi ebaso, tama eno nago nogi ugwaba sobao. Tigidali nai nago nigali, tede eno midigi sabo dao, te tedali gasagi yai mu elama, tama te wiegi yai sawi yai mu dao. Nago te ena mu bugagia koneama, tama ena mu konebao.

¹⁵Te ena idago haliga tomode geme dua dua pedalubo sogo, nago te eno tigi dili ununama, te deliba dąų wabo te nago tigidali suai dao.

¹⁶Ena te haga piligai wai idago haligade bidibadi digi, nago ena suai. Ena te tǫde pedalisiąbadi, tiali goli, nago te naga bukude asęani te nago homugo te tigidali sogo ena te tǫde sesabi elama, bidabo bodolu asęai dao.

¹⁷God, te eno nago homu kolesaga tigidali koneabo te ena kone tųa pobao. Iya, tegobao. Nago homu kolesaga te dwasianu me menio.

¹⁸Te augwali eno nedebaso da, teda nambago te nabisde wę kemi masigi sane te aiyaba mu elaluaibao. Te ena pilama, hodalubo sogo te ena nage dali me bidibao.

¹⁹God, eno homugo nago te dwai sę ebo bidi dabe ela mumainu homu ebao. Tama eno homugo te hwįbo bidi dabego ena tagalumainu homu ebo dao.

²⁰Te bidi dabego te nageba po dwai wali. Tama augwaligo te haniani dwai po nago nogide wabo dao.

²¹Genuai Bidi, eno te nage wei homu isiąbo bidi dabe augwali te eno wei homu me ebeo. Tama eno te nageba hagoma homu ebo bidi dabede te dwai haliga mu ebo dao.

²²Mu tama, eno haliga augwalide pania selama, tama eno te bidi dabe wei mu me ebeo. Eno augwali te ena boi bidi dabe subo tiwai ebao.