Ruma 6:12-18

¹²Kulu yirru, namba jarnirru-mijanganji narnu-wardi mili yurrulu nirru-wurdu kulu rrinyamba-wukanyiya nirru-wurdu, yirru nmanthawu li-wirdi nuwarnu-mangajiwuthu mijanganthawu narnu-wardi, yirru nyamba-ngarrarnmantharra nuwarnu-wardiyu. Rrinyamba-wukanyiya nganinya, “Kurdardi karna-wardimarru awara, karnamba-ngarrarnmala nuwarnu-wardiyu.”

¹³Barninyamba-wirringundarra nirru-nganthai wukanyinjawu wardi wuka ngala rrinyamba-wirringundarra wukanyinjawu yabi wuka yiku ki-Kada. Barninyamba-wirringundarra nirru-marliji wardimanthawu ngala rrinyamba-wirringundarra yabimanthawu awara yiku. Barninyamba-wirringundarra nirru-marnda wingkayawu nambinju nungkarnu-wardinju ngala rrinyamba-wirringundarra wingkayawu nambinju wumba kirrili-nanjima ki-Kada nungkarnu-yabinja. Rrinyamba-wukanyiya nirru-wurdu nganinya nyamba-ngarrarnmantharra nirru-manka nmanthawu nungkarnu-wardinja ngala minja rrinyamba-yibarraya nirru-manka yiku ki-Kada, yirru likungu nmanthawu nungkarnu-yabinja, kangka kirrilu-waninjanguma, kirrilu-waninjanguma nakaringu nyungku-mangajiwuthu nyamba-mirranthawu, kirrilu-yibarra, yirru nmanthawu li-lhungku nirru-ngawulu.

¹⁴Ambuliyalu ngalirru kirra-nykarrinjaninya narnu-yuwa ki-Mujij, narnu-wardi karnu-arri narnu-wunungu yirrunga kulu kirru-wardimanthaninya awara, kirru-arri li-wardi. Ngala nganinyanga ngaliwa Kada jiwini yabi yirrunga, kulu barni-nykarrinja nuwarnu-yuwawu yurrngumantha ngala nyirra-nykarrinjani yiku ki-Kada wumba yabi jiwini, rru-wingkayani yurlurr yiku, likungu li-jawina. Bawuji.

¹⁵Li-mbangu li-wulu li-manji, jalu-yudirrinji kulu jalu-arrinji mili ngatha, “Ngabinya! Yinda janinyu-milirdimanjimu barra nganinya. Ambuliyalu kambala-arri li-jawina, li-jawina nuwarnu-yuwawu ki-Mujij. Jiwini yabi Yijan, yabi barra Kada, kulu kambala-wingkayima winarrku nuwarnu-yuwawu. Karnangambala-ndarra na-mangaji narnu-yuwa. Kambala-wingkala winarrku nuwarnu-yuwawu wumba kambalili-nu ki-Kada, ngambala nyamba-ngarrarnmanthawu nuwarnu-wardiyu. Minja kambala-wingkala wardimantharra. Wayi barra? Janu-wukanyinji yamulu barra?” Jalu-arrinji nganinya, jarnalu-yalbanganji nganinya, ndalu li-manji. Wardimbangu wuka jalu-wukanyinji, wardimbangu. Li-yakayaka jalini, li-yakayaka. Ngalalu jarnalu-yalbanganji nganinya ngalingarna milirdimantharra alunga mili yurrulu nganinya.

¹⁶Yirru, kirrima mirdan, namba jirra-nykarrinji arrkula mirningiya yurrngumantha, namba jirru-ngayangayarrinji yiku, kulu jirrinyamba-yibarranji yiku, jirrinyamba-yibarranji yirru nmanthawu li-jawina yiku, li-jawina nyuwu-mangaji. Barranamba nya-mangaji wuka, namba jalirra-nykarrinji liyi-wuluwu wumba jarrilu-yalbanganji wardimanthawu, jirru-ngayangayarrinji alunga kulu jirrini li-jawina nuwarnu-wardiyu, bajingu kirrinyamba-mirrala nirru-ngawulu. Ngala minja namba yirru jirra-nykarrinji Kada yurrngumantha, namba jirru-ngayangayarrinji yiku, kulu jirrinyamba-yibarranji yirru nmanthawu li-jawina likungu. Bajingu ki-Kada, kirrilu-yibarrala nmanthawu barranamba yurlurr yiku, ka-ngayamala yirrunga.

¹⁷Kulu yirru, ambuliyalu yirru kirra-ninya li-jawina nuwarnu-wardiyu, kirra-ninya li-jawina nuwu-mangajiwuthu nuwarnu-wardiyu, ngala nganinyanga karna-barlirra Wunyatha, karna-barlirra Wunyatha ankaya yirrunga kangka kirrinyamba-yangama, kirrinyamba-yangama yabi barra, kirra-nykarri nya-mangaji wuka, kirra-nykarri nya-mangaji wuka wumba kirrali-nu yiku ki-Jijaj, kulu kirrinyamba-yangama, jirru-ngayangayarrinji nyuwarrkulu, jirru-ngayangayarrinji nya-mangaji wuka ki-Jijaj, nya-mangaji wuka wumba kalu-wukanyi yirrunga nalarrku.

¹⁸Ambuliyalu kirru-arri li-jawina nuwu-mangaj iwuthu nuwarnu-wardiyu, kurdardi kirru-wingkanma winarrku yabi, ngala ki-Jijaj kirrilu-yabima, yirru wayathanthawu nmanthawu li-jawina nuwarnu-wardiyu, kulu nganinyanga jirrini li-jawina barra nuwarrkulu, jirrini li-jawina nuwarniku ki-Kada, li-jawina barra nuwu-mangaj iwuthu nuwarnu-yabiyu. Bawuji.