Rom 6:12-18

¹²Tio, me oio moli ovola etato umalati ge roromuli la vulovulo te la vovo ale kama kokora, veia la masasagala te la vovo ge puli etatou soio te la iruru.

¹³Umala tai veia etato ge mata sosoli La Gima veia eia ge lapu la lima gatou soio te la iruru, veia etato ge mulimuli la vulovulo ale kama kokora. Eala moli etato ge sugu taro la mahulila tegatou tomi isasasa soio te La Tahalo Uru veia eia ge mamuga etatou, la vuhula eia vimahuliti etato. Taritigi etato ge mata mai la tahalo ale hele taroti la pileho, etato ge vipou etatou otalo te la uluva La Tahalo Uru veia etato ge roromuli eia moli sekela, me etato ge pou tavu la vulovulo ale taritigi mai te la igogolu tetala.

¹⁴Eia kama koramuli la iruru ge mamuga amutou, oukati. Amuto kati pou mai ale pala ale la merera te La Tahalo Uru tomu sasae la vulovulo mutou veia amuto boto. Ale igoie amuto pou otalo te la uluva La Tahalo Uru mai te la gilogo tetala.

¹⁵Tio, ale igoie la merera te La Uru eia kati tomu sasae la vulovulo gatou, etato ge vei mave lou, etato ge veia ge pou tavu la iruru lou? Umala!

¹⁶Amuto soioge kama rovia veia la tahalo ale eme tuga te la bilaha tetala, eia la mulugaluga taume. Mai eme ge mulimuli la iruru, eme ge poga tavu la pileho. Mai eme ge mulimuli La Tahalo Uru, eme ge poga tavu la vulovulo ale maroka.

¹⁷Eala moli eau toi taritigi soata te La Tahalo Uru, la vuhula amuto kati gabutatala la vulovulo ale kama kokora, eia pala kisi tola amutou, me igoie amuto mulimuli tigi tatahoti la merera ale amiteu la bilalaha te Kraist tovo amutou ovola.

¹⁸La vulovulo la iruru eia kati kisi tola amutou, me igoie amuto pou mai la bilalaha te La Tahalo Uru moli sekela.