Ruk 12:31-57

³¹Gurnong oh at Got orhe napapat hrepnong naham Gin gur mihat ha songwe ma dahapat danong ohri hat inpera daham ama ohe danong ohwi isip hat sashenmur. Ihat ma sapti han bap gurnong oh Got orhor ama erer oh gon naprisipramur pongopri.

³²Giporpat Jisas oh orhe han ihirnong Norhe han pang han gurnong oh at Got orhe napapindin hrepnong naham Norhorsi paten ohe da oh ihirnong apriprawa dahat pat ohoh ihan gur na napriprakin daham da er hapri. Napriprawa daham da yah hatwi patenmur.

³³Ihat patim guragure erer oh wan han ihirsi mani ohsi mohoma ama mani ohsi hatip hat pati kuuhan ihirnong panggeinmur. Imat panggeipti aw tei mahathe guragure yah han erer oh ruprup mat kasip ung na turkatin ung oh mit sarinmur. Aw tei ohe yah han erer ohot ma saripti erer oh timbas haho gapah han ihir dariyao daskein ihir dam timbas deiyo na matin han sariptimur.

³⁴Guragure yah erer oh ruprup mat ma saripti tei oh guragure dahe atei patmur pongopri.

³⁵Giporpat Jisas oh Gur norhe natamreindin oh natamreindinmat watah aro ram has maro mamen tahat patin nohe natamreindin oh tit natamreindin oh pat hatporhan gur mamen tahat patimdapat ama tamreindin oh natamreindinmur.

³⁶Gurnong nohe natamreindin oh mamen tahat patinmur ma napor oh mama atamreipti han bap ire atamreindinmat ma mamen tahat patiru hat orhor gurhe norhe natamreindin oh natamreindinmat mamen tahat patinmur. Ihiroh Nure hanipyah oh kuu kopen dara den isip temar dapti teinong sus pat ohoh ihan gin apriprohkin daham atamreindinmat mamen taham wamat patimur. Wamat patin oh apris ap gwatei moh kang kang potporhan ihir kapkap ap adapuptimur.

³⁷Imat atamreindinmat na timam mamen tahat wamat patin apris ihirnong Gur ihat ma pati oh yahmuro. Guragure ihat pati ohe pe oh yah yan datiprohemuro potiprohmur. Pora orhordapat tamreipti ohe watah oh ara orhe atamreipti bap ihirnong Gin norhe bes teimdapat gurnong den namdiprohmur. Gur tongnotina por den nitat mat asar pandiprohmur. Pandiporhan ihir amam hatiprohemur.

³⁸Oh kwi temdo kwit mutuhdo apirhanhe ihir na timam atamreindinmat mamen tahat orhorwi wamat patin oh apris amam matporhan ihir amamsi hatiprohe bap ihirmur. Amaru hat orhor norhe han gur norhe natamreindin oh natamreindinmat mamen tahat orhorwi patenmur pongopri.

³⁹Giporpat ihirnong Gur gapah han oh ap dus ros gapah hapatnong oh dahatinmur. Ap nita han oh gin gapah han oh apris gapah hatiprohkin daham am ham kinkin da ham kwet patin oh gapah han oh apris na gapah hapatmur. Oh hanhan dei tei oh it apris gapah hahmur.

⁴⁰Amaru hat orhor gure kinkin da hat pati da oh hanhan deiya tei mah Hanip Brer noh apris buporinsi nahatipra ohoh ihan gur mamen taham kinkin da hat orhorwi patenmur pongopri.

⁴¹Jisas oh ameng oh pot mandatporhan Pita oh Hanipyaha. Go paham meng mama napor oh nuhurnongwi ha imtingwe rim ginaporda da mama kuuhan gonsi ihirsi tap mat ha imtingwe rim ginapor por dahamtipri.

⁴²Por dahamtiporhan Hanipyah oh Gur mama mengnong dahenmur. Kamah han hat pat han oh wannong tit saporim orhe atamreipti han ihir kinhat pat han ohnong ohe erer oh ohe hrepnong mar saproh. Dakuu hat pan hat orhorwi tamrein sapat han tit pathanoh ama han orhornong Gin noh wan teinong tit saprohmur. Gin go apo norhe natamreipti hano ihirnong gwe hrepnong mar papatinmur. Imat papatim den dapti dik oh den pomar nitat mar pandemo papatinmur potiprohmur. Gipora mandam saprohmur.

⁴³Susa oh wan mong oh patdapat it apris wandeioh oh orhe ma potir mengru mat orhorwi papathanoh Go yah hat tamreipat hanhe potporhan oh amamsi han hatiprohmur.

⁴⁴Amamsi han hatporhan orhe hrep papat han erer oh gonsi ama yah mat ma atamreipat han ohe hrepnong Gin mama erer oh gorhe hrepnongwi nadeimur. Gwe hrepnongwi mar paptenmur por orhe hrepnongwi mar mandatipramur.

⁴⁵Yah hat tamreipat ohe pe oh imtipramura; ohe hrepnong mat mandam saporhan Ohe erer oh nohe hrepnong mat namdam pir han moh kapkap na apripra ma hapat daham kat atamreipti kuuhan ihirnong suo den din danongwi haho er tom dam da timbas haho hatiprohmur.

⁴⁶Oh hanhan hat ihat sapatin orhe papat han oh Gin na apriprohkin daham hanhan hat patin oh apris buporinsi matiprohmur. Buporinsi mara ohnong Go er han tit nohe erer moh gwe hrepnong mat namdam noh pir ma hapat por sum batbet isip tit mara kat han ire yah hat ma na tamreipti ohe pe batbet datipri ohe tapnong matipramur. Ihtipramur pongopri.

⁴⁷Giporpat atamreipat han oh orhe papat han oh Go norhe natamreindin oh ihat natamreindinmur potporhan oh am hat patim orhor tamreindin han erer oh dara na mamen taham orhe ma porir mengru na iherhanoh papat han oh it apris wamara kawsi suma batbet isipnap matiprohmur.

⁴⁸Atamreipat han oh orhornong papat han ohe atamreindin oh hanhan hat patim atamrei oh er mat atamreim heisup mar sutin ina hatinmat atamreihanoh papat han oh apris ohe tamreirnong wamara sutinnong sutiproh orhor Hanhan hat patim iher moh daham gar mat kapor atiprohmur. Amaru hat orhor Got orhor tihan atamreindin tihan atamreindin isip mat ma napin pat guroh isip mat orhor ihir ha natamreingwe dahapatmur. Isip isipnap mat ma napin pat bap gurhe isip isipnap mat orhorwi ha natamreingwe dahapatmur pongopri.

⁴⁹Giporpat Jisas oh Noh kakdahnong mama apdap oh kuuhan ire er hat sapti ohe er danong andor has mat adarhetin ohe irat has ohsi tap hat apdapmur. Ihan ama has oh Gin orhor has hat sapatnengo dahat patmur.

⁵⁰Norhornong oh ruumsup oh tom napatiriya hatin hat namkatipramur. Ama ohe ruumsup oh namkar ha timbas hatinoh dahapat ohe ruumsup oh namkat orhor napapatin ama ruumsup oh apris namkatporhan norhe ma dahat pat da ruumsup oh timbas hatipramur.

⁵¹Gur nohnong Oh manap teiwi napapten ohe da ohsiwi apris pat ma hapat dahapri. Basra. Noh nohe danong haya hansi; kakdah orhe danong hat ma pati hansi ite mahaw goshat indin ohe da ohsi tap hat apris patmur.

⁵²Ama da ohsi apris pat ohoh ihan tap ap ma pati irair hanen patihanhe yitir ihir nohe danong hat patihanoh yot ihitdapat ihirnong mahaw deis. Yot ihit nohe danong hat patihanoh yitir ihirnong mahaw deis ihat saprimur. Gin mama pati orhor ihat patiru pateprimur.

⁵³Ma ihat patepri oh itapir ihirdapat monher ihirnong mahaw deiprimur. Monher ihirdapat itapir ihirnong mahaw deiprimur. Supir ihirdapat kuunang ihirnong mahaw deiprimur. Kuunang ihirdapat supir ihirnong mahaw deiprimur. Brer ire inapir ihirdapat kuu ropir ihirnong mahaw deiprimur. Kuu ropir ihirdapat brer inapir ihirnong mahaw deiprimur. Ihat patiru pateprimur pongopri.

⁵⁴Jisas oh giporpat ama tarmuriya kuuhan ihirnong Gure ma ihaptinong oh dahenmur. Gur tom rian apriporhan gur wamara Gin tom wandaprohmur riptimur. Giritperhan arpin tom oh wanpatmur.

⁵⁵Apiap ham mong yah hat indinhe hanip guragure ina bok oh dame naham ap tan oh tihih hahhanoh Gin apiap ham mong yah hat indipra ma hapat dahaptimur. Dahatperhan arpin apiap hapatmur.

⁵⁶Gur tom wandon ohe kiso mong apiap hatin ohe kiso oh wamara gin ihtiproh ma hapat daham am hat pati orhor gin nohe mama ihat sapatnong oh gur kianorim wamar orhor na dahapti. Ihan gur Nuhur am hat patimur ma ripti oh gur dasuh hapti han bap gurmur pongopri.

⁵⁷Jisas oh Gur kianorim yah hat son ohe danong oh wamar orhor Moh yah hat son ohe da ma hapat kianorim na dahapti.