Romu 1:15-27

¹⁵E'ina hu'negu Romu kumate mni'naza nagamotarega, Anumzamofo knare musenkema eme huama hu'na tamasamizankura tusi'za huno navenesie.

¹⁶Na'ankure Kraisi knare musenkegura nagazea nosue. Na'ankure e'i Anumzamofo hanave'a anampina me'neankino, iza'zo zamentintima hanamokizmia zmahonekeno, Jiu vahe esera zamavreteno, anante megi'a vahera zamavregahie.

¹⁷Na'ankure ama ana knare musenkefi, Anumzamo fatgo avu'avaza hurante'nea avu'avamo'a efore hu'ne. Eri agafa huneretima vuno vagaretema uhanatisiana, amentintima hu'zamo azeri ruotagera hugahie. Avontafepi huno, Fatgo vahe'mo'za zamentinti zanteti zamasimura eri'za manigahaze hu'ne. (Hab 2:4)

¹⁸Na'ankure Anumzamo'a, Agra'a monafinkatira rimpahezana eri'ama huno, Anumzamofo fatgo avu'ava nosu'za, fatgo osu zmavuzmava nehaza vahe'mozama ana zamuzmateti'ma, tamage kemofo rentrako nehaza vahera ha'rezamantegahie.

¹⁹Na'ankure Anumzamofoku'ma ke'za antahizama huzantmina amuno zmifina ama hu'ne. Na'ankure ko Anumzamo avu'avazama'a eriama huno zmaveri hu'ne.

²⁰Hakare'zama troma higeno fore'ma hu'neregatima e'neana, Anumzamofo mevava avu'avazana ke'naze. Hianagi hakare'zama erifore huneregatima e'neana hakarezamo'a Anumzamo'ma tro hunte'nea avamente nege'za vahe'mo'za negaze. E'i ana agafare Anumzamofo oku me'nea hankave efore hige'za negazankiza, vahe'mo'za onke'none hu'za osugahaze.

²¹Hu'negu Anumzamofona ke'za antahiza hu'nezagi, zamagra Anumzane hu'za ra agi'a nomiza, humuse hunontaze. Hagi zamagri'a neginagi antahintahizamo zmazeri savri hige'na, zmagu'amo'a hanizampi neme.

²²Zamagra antahi'zane vahe mani'none hu'za nehazanagi, zamagra neginagi vahe fore nehaze.

²³Hagi zamagra manivava Anumzamofo ra agima amigazana, erimare'za fri'naza vahe'mofo amema'agi, nmaramimofo amema'agi, 4'a agazane zagagfamofo amema'agi, zmurugufati vano nehaza zgaramimofo amema'a tro hunte'naza zante ra agi nemize.

²⁴E'ina hu'nagu Anumzamo'a zmatrege'za, zamagra zamaguareti zamavesintaza kefo avu'avazampi unefre'za, kefoza huno havizantfa hu'nea avu'avaza zamagra zamufgare ohunte ahunte nehu'za, zamufga eri haviza hu'naze.

²⁵Anumzamofo tamage kea, havigereti eri revahe nehu'za, Anumzamo, Agra'a troma hunte'nea zgaraminte monora hunte'za amage nente'za, troma hu'nea Anumzamofo ra agia amivava hugazanagi anara nosaze. Tamage.

²⁶Ama anahu agafare Anumzamo'a zmatrege'za, vahe'mofoma agaze ami avu'avazamofo zmavesizampi nehaze. Ane'mo'za osuga zmavu'zmava hu'za zmagra zmagra havi zamavu'zmavara nehaze.

²⁷Anahukna hu'za, venene'mo'za a'nene veazana hugazanagi, netre'za, venenemo'za zmagra zmagra monkozama hu'zanku tusiza huno zamavenesige'za, zamagaze hu avu'avaza zmagra zmagra nehaze. Ana kumima hazazamofo, mizama'a zmagra'a zamata enerize.