Romanos 15:6-31

⁶Jekꞌulaꞌ, echiriꞌ uꞌanom chi xa jun kꞌuꞌx alaq, junam kayak alaq uqꞌij ri Dios, Ruqaw ri Qanimajawal Jesucristo.

⁷E uwariꞌche, hermanos, jelaꞌ pachaꞌ ri Cristo xukꞌul alaq, jekꞌulaꞌ kꞌulu ibꞌ ralaq rukꞌ rutzil kꞌuꞌxaj chiwach alaq re yakbꞌal uqꞌij ri Dios.

⁸Kambꞌiꞌij kꞌu che alaq, e ri Cristo Jesús xoluꞌana toꞌbꞌel qe riꞌoj ri qakojom ri retalil re circuncisión chaꞌ koluꞌkꞌutu ri Qꞌijsaq re ri Dios chiqawach y rukꞌ waꞌ xujikibꞌaꞌ uwach, lik e kuꞌana janipa rubꞌiꞌtisinik ri Dios uꞌanom chike ri qatiꞌ-qamam ojertan.

⁹Xkꞌun nenareꞌ chaꞌ taq ri tinamit na e ta aj judiꞌabꞌ kakiyak uqꞌij ri Dios ruma ri rutzil ukꞌuꞌx chike rike, jelaꞌ pachaꞌ tzꞌibꞌital kan chupa Ruchꞌaꞌtem ri Dios: Kanyak na kꞌu qꞌij la y kambꞌixoj ri bꞌiꞌ la chikixoꞌl taq ri tinamit na e ta aj judiꞌabꞌ.

¹⁰Y je tanchi waꞌ xubꞌiꞌij: Ralaq ri na alaq ta aj judiꞌabꞌ, lik kiꞌkota alaq junam kukꞌ rutinamit ri Dios.

¹¹Y jumul chik xubꞌiꞌij: Onoje alaq che rukꞌiyal kiwach taq ri tikawex che ruwachulew, bꞌixoj alaq rubꞌiꞌ ri Dios, yey lik yakbꞌej alaq uqꞌij Rire.

¹²Yey jenewaꞌ xubꞌiꞌij ri qꞌalajisanel Isaías: Kayaktaj na lo ri Jun ralkꞌoꞌal kan ri Isaí, ri kakꞌun loq re kataqan pakiwi rukꞌiyal kiwach taq ri tikawex che ruwachulew. Yey rike kakubꞌiꞌ kikꞌuꞌx rukꞌ Rire xchaꞌ.

¹³Ri Dios, ri kuya chiqe kakubꞌiꞌ pan qakꞌuꞌx rukꞌ Rire, chunojisaj ri animaꞌ alaq che ronoje kiꞌkotemal y utzil chomal ruma kubꞌul kꞌuꞌx alaq rukꞌ Rire, chaꞌ jelaꞌ lik kanimar kꞌuꞌx alaq che ri oyeꞌem alaq ruma ruchuqꞌabꞌ ri Santowilaj Ruxlabꞌixel ri Dios.

¹⁴Alaq nu hermanos, riꞌin lik wetaꞌam chi utz e lik kꞌo rutzil kꞌuꞌx y naꞌoj alaq y ruma kꞌu waꞌ utz kapixabꞌaj ibꞌ alaq chiwach alaq.

¹⁵Na rukꞌ ta kꞌu riꞌ, na kanxiꞌij ta wibꞌ kintzꞌibꞌan pan che alaq, ma kꞌo ri kuaj kankuxtaj che alaq. Kanꞌan kꞌu waꞌ ruma ri unimal rutzil ukꞌuꞌx ri Dios yaꞌtal chwe

¹⁶chaꞌ riꞌin kinuꞌana raj chak ri Qanimajawal Jesucristo chikixoꞌl rukꞌiyal kiwach taq ri tikawex che ruwachulew. Ekꞌu ri nuchak e kantzijoj ri Utzilaj Tzij re ri Dios chike rike, chaꞌ jelaꞌ kebꞌenuya chwach ri Dios pachaꞌ e jun qasaꞌn lik kukꞌul ukꞌuꞌx, ꞌanom chi chom che ruma ri Santowilaj Ruxlabꞌixel.

¹⁷Ekꞌu lik kinkiꞌkot che ri nuchak kanꞌan chwach ri Dios ruma rutoꞌbꞌal ri Qanimajawal Jesucristo.

¹⁸Ma na kinchꞌaꞌt tane puwi ri kanꞌan riꞌin, xew e kinchꞌaꞌt chwi ri uꞌanom ri Cristo wuma riꞌin; ma ruma ri nutzijom y nuꞌanom chikiwach rukꞌiyal kiwach taq ri tikawex, rike kebꞌuꞌana e aj kojol tzij chwach ri Dios.

¹⁹Yey rukꞌ nimaq taq kꞌutubꞌal y rukꞌ nimaq taq chak xintzijoj ri Utzilaj Tzij re ri Cristo; y ri nuꞌanom e ruma ruchuqꞌabꞌ ri Ruxlabꞌixel ri Dios. Xinjeq kꞌu lo waꞌ Jerusalem, xinikꞌow lo pa taq jujun chik tinamit y xinopon kꞌa Ilíriko. Jekꞌulaꞌ wuma riꞌin xeꞌek utzijoxik ri Utzilaj Tzij che ronoje taq waꞌ wa luwar.

²⁰Ekꞌu lik xinya wibꞌ che utzijoxik ri Utzilaj Tzij pa taq luwar pa na tzijom ta rubꞌiꞌ ri Cristo, chaꞌ jelaꞌ na xiꞌntika tubꞌi ri nuchak puwi uchak junoq chik,

²¹jelaꞌ pachaꞌ ri tzꞌibꞌital kan chupa Ruchꞌaꞌtem ri Dios: Ekꞌu ri tikawex na jinta kꞌo xtzijox chike puwi Rire, kaketaꞌmaj na china Rire; yey ri na kitom ta kꞌana puwi Rire, kakimaj na usukꞌ ri katzijox chike kachaꞌ.

²²E uwariꞌche, ukꞌiyal laj xuaj kiꞌnwila alaq, pero wa nuchak inuqꞌatem;

²³noꞌj woꞌora xinkꞌis uꞌanik waꞌ chupa taq wa luwar. Yey ukꞌiyal tan junabꞌ lik nurayim kiꞌnwila alaq;

²⁴ruma kꞌu riꞌ, lik nuchꞌobꞌom chik, echiriꞌ kanmaj bꞌi nubꞌe kinꞌek España, kinikꞌow ukꞌ alaq y jelaꞌ ajilam qꞌij kinkꞌojiꞌ pa kiꞌkotemal ukꞌ alaq. Ekꞌuchiriꞌ wilom chi wach alaq, utz kintoꞌ bꞌi alaq che ri nubꞌenam kꞌa España.

²⁵Pero woꞌora kinꞌek Jerusalem re kiꞌnjacha jun qasaꞌn toꞌbꞌal ke ri hermanos e kꞌo chilaꞌ;

²⁶ma ri hermanos e aj Macedonia, junam kukꞌ ri hermanos e aj Acaya, xkimol wa qasaꞌn ke taq ri hermanos e nibꞌaꞌibꞌ e kꞌo Jerusalem.

²⁷Ri na e ta aj judiꞌabꞌ lik pa kanimaꞌ xalax wi xkiꞌan waꞌ. Yey kꞌo ne kikꞌas karaj utzelexik kukꞌ ri hermanos e aj judiꞌabꞌ e kꞌo chilaꞌ, ma rike e xetzijon ri Utzilaj Tzij re ri Dios chikiwach. Ruma kꞌu laꞌ lik ubꞌe kekitoꞌ rukꞌ taq ri kajawax chike.

²⁸We xinutzin kan rukꞌ waꞌ y nuyaꞌom chi kan wa qasaꞌn pakiqꞌabꞌ ri hermanos e kꞌo Jerusalem, kꞌa ekꞌuchiriꞌ kanmaj bꞌi nubꞌe kinꞌek España y kinikꞌow kꞌu ukꞌ alaq.

²⁹Wetaꞌam kꞌu chi utz, we xinopon ukꞌ alaq, na xa ta jubꞌiqꞌ ri kankꞌul riꞌin junam ukꞌ alaq che ri rutzil ukꞌuꞌx ri Cristo paqawiꞌ.

³⁰Hermanos, ri Ruxlabꞌixel ri Dios uyaꞌom ri rutzil ukꞌuꞌx chiqe chaꞌ kꞌax kaqanaꞌ qibꞌ. Kantzꞌonoj kꞌu che alaq chupa rubꞌiꞌ ri Qanimajawal Jesucristo kintoꞌ alaq, e ꞌana alaq orar panuwiꞌ chwach ri Dios.

³¹ꞌAna kꞌu alaq orar chaꞌ na kintzaq ta pakiqꞌabꞌ ri winaq e kꞌo Judea, ri eyakatajinaq chirij ri Qꞌijsaq; y ꞌana alaq orar chaꞌ ri hermanos e kꞌo Jerusalem kakikꞌul chi utz wa qasaꞌn.