Rom 15:6-31

⁶pwe ämi meinisin oupwe tipeeufengen le mwareiti Kot, i Semen ach Samol Jesus Kraist.

⁷Iwe, oupwe etiwafengenikemi lefilemi, usun chök Kraist a etiwakemi, pwe lingen Kot epwe fis.

⁸Pun üa ürenikemi pwe Kraist a wiliti eman chon angang fän iten ekewe chon Juta an epwe pwärätä pwe Kot a allükülük, o epwe apwönüetä än Kot kewe pwon ngeni ar kewe lewo,

⁹epwe pwal atufichi ekewe chon lükün Israel pwe repwe mwareiti Kot ren an we tong, usun a mak lon ekewe Toropwe mi Pin, “Iei mine üpwe kilisou ngonuk me lein ekewe chon lükün Israel, üpwe kölün mwareiti itom.”

¹⁰A pwal mak, “Ämi chon lükün Israel oupwe fiti nöün Kot kewe aramas le pwapwa!”

¹¹A pwal mak, “Oupwe mwareiti ewe Samol ämi chon lükün Israel meinisin, oupwe fokun mwareiti i ämi aramas meinisin!”

¹²Aisea a pwal apasa, “Eman mwirimwirin Jesi epwe war. Epwe feito pwe epwe nemeni ekewe chon lükün Israel, nge ir repwe anomu ar apilükülük won.”

¹³Nge ewe Kot, i popun ämi apilükülük, epwe aurakemi ren watten pwapwa me kinamwe ren ämi lükü i, pwe ämi apilükülüköch epwe säsewu ren manamanen Ngünmifel.

¹⁴Ämi pwii kana, ngang won inisi üa lükü pwe oua urela ren föför mi mürina pwal ren sokopaten silelap, nge oua pwal tongeni püsin öüröürafengenikemi.

¹⁵Nge lon ei toropwe üa fokun pwora le makkei ngenikemi usun ekoch itelap üa mochen achema ngenikemi. Üa föri ei pokiten ewe wis mi aüchea Kot a ngeniei,

¹⁶pwe üpwe eman chon angangen Kraist Jesus ai üpwe angang ngeni ekewe chon lükün Israel. Üa angang usun eman souasor lon ai afalafala ewe Pworausen Manau seni Kot, pwe ekewe chon lükün Israel repwe wiliti eu asor mi tiw me ren Kot, a pin ren Ngünmifel.

¹⁷Iei mine lon ai eufengen me Kraist üa tongeni aingaing lon ai angang ngeni Kot.

¹⁸Pun üsap mochen kapas usun och mettoch, nge üpwe chök kapas usun met Kraist a föri rei lon ai emweni ekewe chon lükün Israel pwe repwe aleasochisi Kot. A föri ei ren ai kewe kapas me föför,

¹⁹ren pöchökülen ekewe asisil me manaman pwal ren manamanen ewe Ngünün Kot. Iei usun üa sai seni Jerusalem tori Illirikum o arongafeili unusen ewe Pworausen Manau usun Kraist.

²⁰Iei ai mochen fansoun meinisin, pwe üpwe arongafeili ewe Pworausen Manau lon ekewe leni ia aramas resamwo rongorong usun Kraist, pwe üsap aüetä won eu longolong eman a fen föri.

²¹Usun a mak lon ekewe Toropwe mi Pin, “Chokewe esap wor eman a aronga ngeniir usun i repwe küna, nge chokewe mi rongorong repwe wewe ren.”

²²Iwe, iei popun a wor met a epetiei fän chomong, pwe üsap tongeni feila remi.

²³Nge iei üa awesala ai angang lon ekei leni. Pokiten chomong ier üa fen mochen feila remi pwe üpwe churikemi,

²⁴üa apilükülükü ai üpwe tongeni feila remi iei. Ngang üa mochen pwe üpwe churikemi lon ai sai ngeni Spain. Üa mochen oupwe alisiei lon ai sai ngeni ikenan me mürin ai pwapwa le nonom remi ekoch fansoun.

²⁵Nge iei üpwe feila Jerusalem o uweela alilisin ekewe chon pin mi nom ikenan.

²⁶Pun ekewe mwichefel lon Masetonia me Krik ra ekiekifengeni ar repwe fangala ar asor fän iten alilisin ekewe chon wöüngau me lein ekewe chon pin lon Jerusalem.

²⁷Ei ekiek püsin ir ra filätä ar repwe föri. Nge wesewesen pwüngün mi wor wiser pwe repwe alisi ekewe chon wöüngau. Ekewe chon Juta ra fangala ar kewe feiöchün ngün ngeni ekewe chon lükün Israel, iei mine ekewe chon lükün Israel repwe alisi ekewe chon Juta ren ar kewe feiöchün inis.

²⁸Lupwen üpwe awesala ai angang o ngeniir unusen ewe moni aramas ra fesini fän iter, üpwe churikemi lon ai sai ngeni Spain.

²⁹Iwe, üa silei pwe lupwen üpwe torikemi, üpwe uwato remi unusen än Kraist we feiöch.

³⁰Ämi pwii kana, üa pese ngenikemi fän iten ach Samol Jesus Kraist pwal fän iten ewe tong ewe Ngünmifel a fangeto, pwe oupwe etiei lon ämi tiliken le iotek ngeni Kot fänäsengesi.

³¹Oupwe iotek pwe üsap feiengau ren ekewe chon Juta resap lükü Jesus, oupwe pwal iotek pwe ai angang lon Jerusalem epwe ketiw me ren ekewe chon pin mi nom ikenan.