Romanos 11:7-9

⁷Ta ¿yoso caa? Ñu Israel nanducu̱ xaan ñu cuhva cuvaha ñu nuu Nyoo soco ña ñihi̱ ñu cuhva. Soco ñu cha nacachi̱ maa Nyoo chii, ñihi̱ ñu cuan cuhva. Ta inga ñu Israel cuan ndundava̱ xaan añima ñu.

⁸Tari catyí nu tutu Nyoo tyehe caa: “Nyoo chaha̱ ra noo cuhva chi ñu cha ma cutuñi iñi ñu. Ta chaha̱ ra chɨtɨ nuu cha ña cutuñí iñi ñu cha nyehe ñu. Ta chaha̱ ra soho ñu soco ña cutuñí iñi ñu cha chiñi̱ ñu, ta nyacua nya vityin ta tyicuan caa ñu.”

⁹Ta suri catyi̱ tucu ra David tyehe caa: Sɨɨ xaan cuñí ñu chihin vico cha iyó ñu, soco yucuan cuví trampa cha sanacava̱ chi ñu. Ta cha cuenda cuan ta cutachi tuñi Nyoo chi ñu.