Roma 2:2-10

²Na ai nuatuiyao Eaubada ena hedudurai i taru isi teina baaea tauabidi ta potadi eai, i dudurai mo.

³Tau e, oa teina baaea tauabidi u heduduraidi, eo em laulau hinage doha, em nuatu saha u ene Eaubada ena hedudurai abo u dagogabaei?

⁴E, ena lolo saesae‐ariridi, eo ena nuapaipai, eo ena nuatoatoa i laulau, u halanuinuiedi; nige u nuatui Eaubada ena abilolo ede i woeaim eo i henuabuim?

⁵Na nuam i oiura eo nige begana i bui arinai ouyalayala u peiauri nonohai, abo u hearo ouyalayala asubenana eai, Eaubada ena laulau dudurai heduduraina asubenana eai ne abo se hemasaraha.

⁶Hari tau, hari tau, ia maisadi abo i mosei edi laulau gonogonoadi mo:

⁷headi laulau lolo se nuatupaipaiedi, hedebasae eo heasisi eo mauri nige i posa se eooidi, aridi eai mauri nige nosina abo i mosei:

⁸na isi taululusenauri, eo riba mamohoina nige se awaabiei, laulau gewagewa mo se awaabiei, aridi eai, ribasuu eo ouyalayala abo i mosedi.

⁹Amamna lailai eo nuadubu lailai tatao gamagaridi, esau eo esau nige esau i deha, baaea tauabidi abo se hearodi, Iudea tataodi se abi bagubaguna, abotai Heleni tataodi hinage;

¹⁰na namanamari, eo hedebasae, eo loni, tatao gamagaridi, esau eo esau, lolo tauabidi abo se hearodi, Iudea tataodi se abi bagunai, abotai Heleni tataodi hinage.