ROMA 2:2-10

²Ita diba Dirava ese inai bamona idia karaia taudia edia kerere davana ia henia, bona ita diba Dirava ena kota be ia maoromaoro momokani.

³To oi ese taunimanima haida oi gwauraia kerere, ma oi ese danu idia edia kerere oi karaia noho! Oi laloa Dirava ena Kota dekena amo do oi heau mauri diba, a?

⁴Bona inai danu, Dirava ena kara be namo herea oi dekenai, ia badu haraga lasi, bona oiemu kara dika davana be oi dekenai ia henia haraga lasi. Inai Dirava ena kara namodia, oi laloa idia be anina lasi, a? Sedira oi diba lasi, Dirava ena bogahisihisi kara ena badina korikori be inai: Oiemu lalona do oi giroa totona?

⁵Oiemu kudouna ia auka, bona oiemu lalona oi giroa lasi dainai, oiemu kerere davana oi habadaia noho. Vadaeni Dirava ena badu ia hedinaraia Kota Dinana neganai, be inai kerere davana badana do oi abia.

⁶Dirava ese taunimanima ta ta ibounai dekenai, edia kara hegeregerena edia davana do ia henia.

⁷Taunimanima haida ese kara namo idia karaia noho nega ibounai. Idia ese Dirava ena hairai, iena hanamoa, bona iena doko diba lasi maurina idia tahua noho nega ibounai. Inai bamona taudia dekenai be Dirava ese mauri hanaihanai do ia henia.

⁸To haida be idia sibona edia namo idia tahua, bona hereva momokani idia negea, kara kerere do idia karaia totona. Inai bamona taudia ese Dirava ena badu bona iena panisi do idia davaria.

⁹Kara dika taudia ese kerere davana metau bona hisihisi bada do idia davaria, Iuda taudia be guna, bona Iuda lasi taudia danu.

¹⁰To Dirava ese iena hairai, iena hanamoa, bona iena maino do ia henia kara namo taudia ibounai dekenai, Iuda taudia guna, bona Iuda lasi taudia danu.