Roma 15:14-33

¹⁴Egu tataoyao e, arimiu eai nuagu i taru paana ea nuatui hinage omi lolo au monau boriboriri, hinage headidiriuioimiu abina au atao.

¹⁵Egu tataoyao e, taiede ea uriuri adiadidiri ta arimiu eai, nuamiu bena abo ea hesaedi, paana ainauia Eaubada i leama arigu eai wa,

¹⁶arinai eau ea hemala Iesu Keriso ena heaheari Murimuri‐tataodi aridi eai. Eaubada ena evanelia eai eau kohena abiabina abo ea abiabini, Murimuri‐tataodi edi aitalasam eai Eaubada abo se henualolo, ia ede Earua Tabuna i hetabuei.

¹⁷Keriso Iesu boeana eai, agu paisoa Eaubada enana taba ea riba‐pasipasiei.

¹⁸Na taba nige saha ea ribaei, meta mo Keriso eau boeagu eai i ginauri, bena Murimuri‐tataodi i heawaabidi, riba eai eo laulau eai,

¹⁹eo heiheinoidi gigigiboridi, eo noonoodi, Earua Tabuna gigiborina eai, arinai Ierusalema eai, i lau e Iliriko i hetaiiri sigasigana ede, Keriso ena evanelia ea lauguguiaheohi.

²⁰Taiede ea aipate bena evanelia ea lauguguiai nei dimodi eai ne Keriso esana sora nige se ataiei, ata esau ena paa potana eai ea tarini.

²¹Na doha se uriyao si ene, “Tatao wa aridi eai ia wasana nige se duai, isi abo se ita; eo sora nige se ataiei, abo se nuatui.” (Is. 52.15.)

²²Hinage paana ede ma hisa se hemodegu, sora nige ea laowa arimiu eai.

²³Na teina tupo eai ta dimo gamagamagari ea heohidio, hinage borimai gamagari egu gadosisi lailai bena ea laowa arimiu eai.

²⁴Sora ea lau Sipania abo hinage ea laowa arimiu eai; ea henua ea itamiu, metai ma adaugu abo egu dobila eai au hegerugu, na sora ta mia begana, egu amna lolo arimiu eai ea abi.

²⁵Abo ina ta ea dobi Ierusalema eai hetabu tataodi ea heayaiedi.

²⁶Maketonia eo Akaia tataodi, ma nuaamnadi hetabu tataodi gogogesagesadi Ierusalema eai se ainauiaidi.

²⁷Mamohoi nuadi se amna, iaede adi haga se hemaisa. Ena Murimuri‐tataodi Iudea tataodi edi earua ginaurina ainauiana tupona se abi, i lolo hinage isi buluma ginauridi aridi eai se heayaiedi.

²⁸Teina paisoa ta ea abiheohi, eo edi ainauia wa wau tatao wa ea mosei aridi eai, abotai egu lau Sipania, abo ea laowa.

²⁹Ea nuatui ena ea laowa arimiu eai, ea laowa Keriso ena ainauia lolona eai, hemonauboriboririna eai.

³⁰Na egu tataoyao e, ea awanorilaowa arimiu eai, ea ene Guiau Iesu Keriso debana eai, eo Earua ena gadosisi hinage debana eai, omi maeguyao au adidiri emi uura Eaubada arinai, eau enagu.

³¹Isi tauawaawayagara Iudea eai nimadi eai bena se hemaurigu, eo agu paisoa wa Ierusalema eai, hetabu tataodi abo se abi ma nualolodi;

³²eau Eaubada ena nuatu debana eai bena ea laowa makodegu, eau maemiu abo ta aiyawasi, nuada se gougouai.

³³Eaubada loni tauleamana, omi gamagarimiu maemiu i mia. Amen.