Rom 3:13-28

¹³Ndinai waa nyaangɨt ndinyangu kat vatnyavla lɨgandɨ. Ndina kwundimba woseka walɨgandi. Ndinai waa nyaangɨt mbai vla ndu nyan kat sɨlɨgandɨ.

¹⁴Ndinyangu kat kavle nyaangɨt mɨna ngambulɨndi.

¹⁵Kao nambwiya ndi. Kwiyatapman ndu sɨlɨndi.

¹⁶Kɨta kava yɨnjeyan wan ngepma vat tɨgiyandɨ.

¹⁷Ngwaama nyan tɨvak kat kai walɨndi.

¹⁸God kat ana yelavɨka lɨndi.

¹⁹Wungi kat tɨga God ngepma ngepmamba lɨga nɨmba kat nɨma vat yigiyandɨ. God waa lo wuka lɨga nɨmba vɨlɨgandi. O! Nɨn kavle vat mɨna yetɨlɨganɨn waa vɨlɨgandi aywaa. Wutndi maa God walɨgandɨ. Wunai waa nyaangɨpmba ana yetɨlɨgangwuk. God waa nyaangɨt wuka yetɨlɨnangat God nɨn kat wunai lɨga vla lɨgangwuk ana waigandɨ. Manda kat. Nɨn ndɨnai waa nyaangɨpmba ana inaka yetɨlɨganɨn. Ndɨnai waa nyaangɨt kavle vat yetɨlɨnangat nɨn kat sɨmagalɨgandɨ.

²¹Nat vapmba God nɨn kat wunai lɨga vla lɨgangwuk waa waigandɨ. Wan vak God waa nyaangɨt kwundimba mbuka pɨlɨwutɨga nɨmbagwi nat nɨmbo wutaa pɨlɨwutndi tamba. Jisas Kraist kwuta njɨvwa nɨna lak yaandɨ waneyan God nɨn kat wunai lɨga vwa lɨgangwuk waigandɨ. Juda walɨnja nɨmba Juda ana ndi nat nɨmba aywaa wan vapmba God ndi kat klagiyandɨ.

²³Aywaa kavle kat mɨna yetɨlɨndi. God yetɨga vapmba yetɨvak yilavindi.

²⁴Wungi kat tɨga God ndinyangu kat aywaa awagapma wandɨ. Wuna nyan ngwuk kat tɨga wun kat wenga kwindɨ. Wun kat wenga kwindangat ngwuk kat wunai lɨga vla lɨgangwuk waigowun waa wandɨ God.

²⁵God Jisas kat ay wandɨ maa nɨna kavle vak aywaa Jisas Kraist yiga klandɨ. Klandɨ maa God ndɨ kat sɨndɨ, kiyandɨ. Ndɨ kat tamba sandɨ. Nɨn kat ana sɨgiyandɨ. God nɨn kat tɨga Jisas kat sɨnda kat nɨna mbangɨ wiyo waavi taagndeyan God nɨn kat ana sɨgiyandɨ. God kavle yetɨna vak kat sɨgiyaa vak ana kwagalandɨ. Tamba sɨndɨ. Tamba la nɨmba ndina kavle vat yetɨnja vak kat ndi kat ana sɨndɨ. Manda kat. Ngɨni wuna nyan kat ndi kat tɨga sɨgiywoun waa walaa ndi kat ana sɨndɨ.

²⁶Mbambala wungi vat sɨgak. God kavle yetɨlɨna vak kat sɨgiyaa vak ana kwagalalɨgandɨ. God nɨn kat tɨga Jisas kat sɨndangat nɨna mbangɨ wiyo waavi taagandeyan God nɨn kat wuani lɨga vla lɨgqangwuk waigandɨ. Ana sɨgiyandɨ.

²⁷Kɨta nyan God kat ana apma waigandɨ. Apma vat tɨga lomba tɨwangat vɨlaa apma vat wun kat yɨmɨn waa ana waigandɨ. Manda kat. Nɨna njɨvwa vɨga God nɨn kat ana kwunatndɨ. Jisas kwuta njɨvwa kat nɨna mbangɨ wiyo waavi taagandeyan God nɨn kat kwunakiyandɨ.

²⁸Jisas kwutaa njɨvwa kat nɨna mbangɨ wiyo waavi taagandeyan God nɨn kat waigandɨ. Wunai lɨga vla lɨgangwuk waa waigandɨ. Nɨna apma njɨvwa vɨlaga nan kwunakiyandɨ. Vɨlɨganɨn.