Rom 3:13-28

¹³Age conoga eu qalqal heel cebec cinigwe. Age beilamagana age uhulec je madegina. Age biamaga dunuh eu man sononec agena ceeh sahalic me qeeca.

¹⁴Age je me qee gulihinca conogana gaid madegina.

¹⁵Age dana qagadocnu mahuc bahic gugulegina.

¹⁶Saen cunug age ceteteh me qee mumudi culumen geh dana adegina.

¹⁷Age dana malol bilec kobol qee toodogina.

¹⁸Age Anutnu cumunec nag odi qee dogina,” ena.

¹⁹Odocob ege doqona, Mosesna loo je eu uqa egena silail eu himec ihacgena, eunu dana oso uqa ija dana ititom ec madecwe qee. Eunu cel je loo je madena eu dana cunug age je madecwe qee bilimeig dana maha cunugnadec ege Anut amegna cahuldocca biluquna ec madoqagannu eu dana loo je bisalu bilegina eu age maadena.

²¹Qilaqa Anutna kobol uqa ege dana cajaca ititom ec madena eu camasac men. Eu loo je toodoc jicna qee calel. Eu jic filna calen. Odon qa je eu je hahun madec danana jaqec jenaca Mosesna jaqec jenaca nijia eu Anutna kobol ititom inu je camasac madena.

²²Anutna kobol ititom eu odi. Dana Jisasnu waug meleena eu uqa Anut dana ititom ec madena. Odocob dana cunug Jisasnu wawaga meleena age ijanaga dana ititom adegina. Anut uqa dana am cunug odi odona eu odoc filna qee odona.

²³Ge, ege dana cunug ege silail mom eunu ege Anutna fulacdoc ben eu ocwe qee.

²⁴Anut uqa eelgec uum igina. Uqa Jisas Krais golacna ege fajigen euna himec uqa ege dana ititom gena.

²⁵Anut uqa gemag bec gondocnu Jisas Krais ihandon. Eunu uqa cal meceb uqa golacna dana uqanu wawaga meleena eundec agena silail cagasiadigiannu nesili ehuden. Anut uqa dana weledec camuhulaadei agena silailnu mahuc ameg wadacadecnu qee cisdoloi. Eunu Anut uqa odonna uqana kobol ititom eu camasac ihacgen.

²⁶Qilaqa uqa dana agena silailnu cisdona. Eunu uqa uqana kobol ititom eu qila camasac mudigia odona. Eu odina Anut uqa uqadodoc eu ititom bahic ihacgena, odocob dana Jisasnu waug meleena uqaha Anut dana ititom dona.

²⁷Eunu egedodoc binanige sulecnu ihocfo? Qee bahic! Jic eu wele menen. Eetana jic eu menen? Acahna loo je toodu odoc kobol euna jic eu menenfo? Qee bahic! Wawige meleec euna jic eu menen.

²⁸Ge, ege odi cisdoqona, wawige meleecna himec dana uqa ijan ititom eu ona. Uqa loo je toodu odocna ijan ititom qee ona.