Roma 3:13-28

¹³Awa ayao muje manuga rai mamo ngkakai, raurata irati vatane anasino kopa mandami ti mbaug no aipapo rai. Aarurijate ntairi mansawa rai, awa ayao mamo mamun maisyare tawae mamune ramaisy.

¹⁴Anaamatane kapainyo mansai ntairi mawa rai.

¹⁵Wavave wo vatane maotar wo maubaisy.

¹⁶Uta no rui rui vayave wo siurije muno ana nsosobe raugavere.

¹⁷Weramu wo ayao saumane rarijate jewen weye wantatukambe rai.

¹⁸Muno wo Amisye asyaniv omamo meweno mai.”

¹⁹Ananyao Musa mamo raugaje irati vatano Yahudi mansai, weti wandaen ama anakotar tenambe mo ratoe rai mbe akarive Yahudi mai indamu ubeta rai. Weti vemo vatan inta po raura pare, “Risyamo ayao kakai meweno rinai,” weinya! Weye vatan tenambe no mine so wo ayao kakai rave, weti indati Amisye po mangke rapatimugo mai.

²⁰Ananyao Musa mo vatane mauga ti umamai no Amisye amune raije ramu, weye vatan inta po rarijat tenambe jewen bayave. Yara Ananyao Musa raugaje indamu mo wansanyao ti wamo wama ayao kakai raen kakavimbe.

²¹Amisye apa unanuijo po ratayao indamu wamamai no amune rai omamo Ayao Musa muno Ayao Anawae yo raurairive to, muno soamo raroron kakavimbe no taiso: Wamanave Yesus Kristus ai, weamo Amisye pare wamamai no Amune rai. Weramu wambeta Ananyao Musa rai omirati mo wansaveti wamamaisy oma jewen. Amisye apa unanuije umaso mamo Po ratayao vatan tenambe mansai. Weti vatano are nawirati wanave Yesus Kristus ai, weamo Amisye pare umamai no Amune rai. Vatane inta sasye ramu: Amisye po vatan inta aena amuinyo vatano kaijinta aije ramu.

²³Weye vatan tenambe wo ayao kakai raijaro mansai, weti ugwaravainy irati Amisye ai muno Apa kovo ntiti rai.

²⁴Amisye apa kove maweso vatane mai indamu Po maveti umamai no Amune rai. Po maveti umamaisy weye Yesus Kristus po mapaya ayao kakaije rai to.

²⁵Amisye po Kristus atutir de kakai indamu Po vatane awa ayao kakaije ama mangke ranawan, Apa mavu nsororop indamu Po awa ayao kakai rapaya mai arono wanave Ai, wirati Po maugav wakare Amisye ai. Maisyare wemaisy, wandaen Amisye pamo mamaisy muno Po ayao mamaisye obo rapatimu. Weye arono wusyinoe vatane wo ayao kakai rave, weamo Amisye pavave po mangke raugaje mai jewen, yara atawandi mai.

²⁶Weramu Amisye animari ayao kakai umaso raije jewen, yara Po ama mangke raugaje ntuna Kristus ai indamu Po ranawan vatane mansamarom no inyo kapite rai. Weti naisoamo wandaen Amisye pamo mamaisy weye Po mangke rapatimuga mamai dave, muno Po raura pare vatano wanave Yesus aije umamai no Amune rai.

²⁷Maisyare omai ti, vemo wansararin nora muno wansanuga manakoeyo Ananyao Musa rai nora! Weye wambeta ama ananyaowe rai omi mbewar wamamai no Amisye amune raije jewen. Yara wama anave Yesus Kristus aije mbewaramo wamamai no Amisye amune rai.

²⁸Maisyare omai ti, wamo raen: Vatane apa anave obo mi mbewar ti mamai no Amisye amune rai, yara po Ananyao Musa rarijat weamo mamaisye ramu.