Roma 3:13-28

¹³Marac‐jeŋic i hâmoc qâŋɋâŋ bâbâfua, nameŋ‐jeŋic forisieme eatuc dâŋ wefuekac, qotâ marasiŋ kisoŋnerâ jueŋgopieŋ.

¹⁴Bipic‐jeŋic sâwec â aaric dâŋte gegerockeekac.

¹⁵Ʒikare kike afec jueŋgopieŋ.

¹⁶Ima samaki bahuc tuhu bâfuaeŋgopieŋ.

¹⁷Wamare hata ine kâuc baeŋgopieŋ.

¹⁸Â ʒâŋe mai‐jeŋicko Anuture hâhâwic mi fokac.”

¹⁹Nâŋâc ʒiŋuc manaeŋgopeneŋ: Sâcmutâc dâŋ i dâŋ rune nâŋe nâzâkicne. I ŋic sasawa fuŋne‐nâŋec rituhuc micnâŋec ɋâtâocte ekicne. Eme ŋic mâmâc sasawa kiŋnâŋec Anuturao fua‐fârekac.

²⁰Sâcmutâc dâŋte erâ kiŋ nânâwoc ro i Anutarao moc mi fokac. Sâcmutâc dâŋzi sindaŋ‐nâŋec bataniŋkeekac hâcne.

²¹Eme irec sâcmutâc dâŋ fohame Anutuzi tiŋne‐ticne fua taniŋkeocte hatane moc bâfuawec fokac, hata i sâcmutâc dâŋqâhâcko â porofete jaŋerao wâc biŋedâŋ‐ticne mu qâreŋ ekicne.

²²Jesu Kristo manasiŋkehuc kiŋfâsâc erâ juju, hata i hâcne mamanasiŋhec sasawa jaŋere biŋe ekac. Fuŋne‐nâŋec bârâwiŋ mi fokac,

²³Nâŋâc mâmâc sasawa sâqorembeŋte Anuture eri tatamacko fifisinere sâc mi eŋgopeneŋ.

²⁴Ehame Kristo Jesu e kiwiric‐nâŋec rowecte Anutuzi aki anonoc‐ticnere erâ kiŋfâsâc bacnâpoekac.

²⁵Eki mume Jesu e socticnezi sâqocne‐nâŋecte erâ taha bawec, eme e manasiŋkeniŋmuzi taha i biŋeckeniŋmu. Sâqocne ewarehuc jukicne irec kiŋ i Anutuzi buuruc‐ticnere râeme fowarehuc juwecte Jesu hâmocko râewecko tiŋnere fuŋne bataniŋkewec.

²⁶E tiŋnere rune juekac, â Jesu manasiŋkeniŋmu jaŋe kiŋfâsâc bacjopaekac, irec fuŋne dameŋ ʒiŋuczia taniŋkeocte iŋuc hâcne ewec.

²⁷Eme mumuteŋ‐nâŋec moc fokac me? Aricne, mumuteŋ‐nâŋec hetâtiekicne. Wemozi hetâtiewec? Eehâmo giere hatazi me? Aricne, mamanasiŋte hatazi.

²⁸Irec dâŋ ʒiŋuc manapene fozejec: Ŋic nâŋâc sâcmutâc dâŋ rereŋkere mâcne, mamanasiŋte erâ kiŋfâsâc fuaeŋgopeneŋ.