ROM 11:23-34

²³Má ngo matananu Israel da tapriu alari sál erei káp di tini longoi mai ruruna, má ngo da mur i sál án ruruna sang, ngorer ái Káláu na apatap kalengna di mul uri aun lowo kabin ái Káláu sang a artálár suri longoi ngorer.

²⁴Kápate malmu suri rákán lowo tili bos na patap i aun lowo di soi, káp a tini ngorer. Mái sár á gam ái rung tili risán gam ngorer i rákán lowo tili bos, mái Káláu a apatap i gam uri aun lowo di soi. Má tan Israel di sang á bos rákán muswan á aun lowo er di soi, má ngorer a malmu sang suri ái Káláu na apatap kalengna di uratung i aun lowo er dikte kopkom til on tungu.

²⁵Rang buhang, iau nem ngo gama talas suri holhol taru a tur punpunam tungu suri ngorer gama káp apakta pas gam sang. A ngoromin. Marán tili matananu Israel ákte laklak i bál di, má na ngorer pagas pang i bung ák hau kunlán i mámát i rung tili risán dikte kusak no,

²⁶má erár ái Káláu na aliwi matananu Israel no. A ngorer a parai i Buk Tabu ngo, “Tám Arasengsegeng na aptur til Saion, má ái na sas palai alari rang kopkom i Iakop á kándi tatalen án tur kaplah alar Káláu.

²⁷Má kang kamkabat mam di a ngoromin, ngo i pákánbung erei ina pah palai kándi bos sápkin tatalen.”

²⁸Kabin matananu Israel di mata palai lain arbin, ái Káláu a mák di ngo di kurtara mai, má ngorer ák tangan gam ái rung tili risán. Mái sár ái Káláu kán tu mámna di be á matananu Israel kabin i kán oror a para páksi singin rang támin i di er ákte ilwa pas di ur káián.

²⁹Áá, ái Káláu káp a tini arkeles suri kálámul a ilwa pasi má kápate lu top kalengnai artabar er ákte tari.

³⁰Tungu gam á bos rung tili risán káp gam tini taram i Káláu. Mái sár onin ái Káláu ákte mámna gam kabin matananu Israel di matai sál si Káláu má kápdite taram on. Áá, kabin i abulbul káián matananu Israel, ái Káláu a mámna gam má ákte pasbat i sál pas gam.

³¹Má a ngorer mul mam di. Onin káp di tini taram i Káláu. Ái sár ái Káláu na bali mámna di mul ngorer ákte mámna gam i pákánbung káp gam tini taram on be.

³²Áá, ái Káláu ákte inngasi singin boh matananu no ngo di kis án kamkabat kabin i káptábun á taram. Má kán holhol taru a ngoromin. A inngasi kándi abulbul si di ngorer suri na inngasi kán armámna narsá di no mul.

³³Ai! Wa ái Káláu a konom sorsorliu mai kán arasosah! A polon á hol taladeng má a tuan kahkahlangit á kán mánán! Kápte kes na para tusi tan táit ái Káláu a hol on! Kápte kes na talas suri sál a mur on ái Káláu!

³⁴A ngorer a parai i Buk Tabu ngo, “Sinih ák mánán tangrai kán hol ái Káláu? Sinih a artálár ngo na apislai holhol si Káláu?