Psalms 78:5-58

⁵Pwe a kotin kauada men kataman eu ren Iakop, o kotikida kapun eu ren men Ijrael, me a kotin kakaliki on jam atail akan, pwe ren ujelan nair jeri kan,

⁶Pwe di en mur en aja due, o jeri ko, me pan ipwidi; o ni ar kokoda, ren pil kajoi on nair jeri kan,

⁷Pwe irail en kaporoporeki Kot, o ren der monokela en Kot a wiawia kan, o ren kapwaiada a kujoned akan,

⁸O ren der dueta jam arail akan, me kainok kanudi o katiwo eu, me monion arail jota teneten, o nen arail jota melel on Kot;

⁹Dueta kainok Epraim, me wa tatan mauin, ap purela jan nan pei.

¹⁰Irail jota dadaurata inau en Kot, o re jota men weweideki duen a kujoned akan;

¹¹O re monokelar a wiawia kan o a manaman akan, me a kotin kajanjale on irail er.

¹²A kotin wiadar manaman akai janjal mon jam arail akan nan Äkipten, nan jap Joan.

¹³A kotin palan pajan madau o kotin mueid on ir, en kotela, o wiadar pil dueta kel takai eu.

¹⁴A kotin kalua kin irail tapok ni ran o, a ni pon umpul en kijiniai.

¹⁵A kotin palan pajan paip nan jap tan o kanim pile kin irail pil toto.

¹⁶O a kotin kapkapwile wei pilap kai jan nan paip, pwe ren pwile wei dueta pilap laud akan.

¹⁷Ari jo, re dadaurata ni arail dipi on i, o re kaonioni me Lapalap o nan jap tan.

¹⁸O re kajonejon Kot nan monion arail, ni ar inon ion kan arail mana.

¹⁹O re palian Kot ni ar inda: Melel Kot pan kak wiada tepel eu nan jap tan?

²⁰Kilan, a poki paip o, pwe pil en pwarado o pilap akan pwilepwile wei, a iaduen, a pan kak kida prot o uduk on na aramaj akan?

²¹Ieowa lao manier mepukat, ap kotin onionadar, o kijiniai wiauier ren Iakop, o onion lel on Ijrael,

²²Pweki ar jo kamelele Kot, o jota kaporoporeki a jauaj.

²³A ap kotin majani on tapok en poa kan, o ritinida wanim en lan akan.

²⁴O kotin kamoredi on ir mana, pwe ren mana, o a kotiki on ir prot en lan.

²⁵Irail kanalar prot en tounlan kan; a kotin kadar on ir kijin mana toto.

²⁶A kotin kapwaredar pan lan an en maj en lan, o ni a manaman a kotin kamokidada an en pali air.

²⁷O a kotin kamoredi on ir uduk dueta pwel par, o manpir dueta pik en oror.

²⁸O a kotin kapup irail di waja karoj, me irail kaujon ia.

²⁹Rap manamana o medilar kaualap, o a kotin mueid on ir ar inon.

³⁰A ni ar kapwaiadar ar inon, o ni ar manamana,

³¹Onion en Kot ap lel on irail er, o kamelar ol lapalap re ’rail, o kotin wokiedi manakap en Ijrael kajampwal akan.

³²A re kalaudelar arail dip, o re jota kamelele a manaman akan.

³³I me a kotin mueideki ren mela, re jota paida, o ar apwal akan me toto arain ar maur.

³⁴Ni a kotin kame irail la, rap idok i, o wukila, o rapaki Kot.

³⁵O re tamandar, me Kot kele parail o Kot lapalap ar jaundor.

³⁶O re lik janjal mau on i ni au arail o re likam on i ni lo ar.

³⁷A monion arail jota teneten on i, o re jota dadaurata melel a inau.

³⁸Ari jo, a kotin kalanan on ir, o kotin makeki on ir dip arail, o jota kame irail la, o katukiedi a onion pan pak toto, o jota onioni melel.

³⁹Pwe a kotin kupura, me irail pali uduk, dueta kijinian, me pir wei o jolar puredo.

⁴⁰Pan pak toto re kanudi on i nan jap tan, o kakupur juedi i nan mal.

⁴¹Irail pur on anjau karoj kajonejon Kot, o re akapuni on me Jaraui ren men Ijrael.

⁴²Re jolar tamanda lim a manaman, me dore ir ala jan ar imwintiti kan ni ran o.

⁴³Duen a kotin wiadar a manaman akan nan Äkipten o a dodok kapuriamui nan Joan.

⁴⁴A kotin kawuki on nta ar pil akan, rap jolar kak nima jan ar pilap akan.

⁴⁵Ni a kotin kapwaredar man jued akan nan pun arail, me kan ir ala, o proj akan, me kawe ir ala.

⁴⁶A kotiki on muedi ar tuka kan, o ar wantuka on man jiek.

⁴⁷A kotin kawekilar akel ar wain o tuka kan ki akel tikitik.

⁴⁸A kotin kamekila ar man akel akan o ar pwin man akan liol.

⁴⁹A kotin onion melel o porone won ir tounlan jued kai, o mueid on ir, ren linaranar, o morjued, o kainjenjued.

⁵⁰A kotin kaonopa dan onion al apot, o jota dorelar maur arail jan mela, o kotin mueid on kilitop ni maur arail.

⁵¹A kotin kamelar mejeni karoj nan Äkipten, mejeni en ar kelail nan im en Am akan.

⁵²A kotin kaluala japwilim a kan dueta pwin jip eu nan jap tan.

⁵³A kotin kalua irail ni pun, pwe ren der majak meakot, a madau kadupaledi ar imwintiti kan.

⁵⁴A kotin wa ir ala lel ni irair en jap jaraui, lel nana wet, me lim a pali maun kileledier.

⁵⁵O kotin pakipaki men liki kan mo ’rail, o kotin nek on ir jap arail, pwen jojoki, o a kotiki on kainok en Ijrael akan, en kaukaujon nan im arail.

⁵⁶A re jonejon? o kaonion Kot lapalap, o jota peiki on i, o jota duki on a majan akan.

⁵⁷O re muei jan o mamaleki meakaroj, dueta jam arail akan, o re jota teneten, dueta kajik katieu luet eu.

⁵⁸O re kaonion i ni ar kaudok pon dol akan, o re kupur juedeki i ki arail dikedik en ani kan.