Buk Song 78:5-58

⁵God i givim lo bilong en long ol manmeri bilong Israel. Em i givim tok long ol lain tumbuna bilong Jekop, bilong ol i bihainim. Em i tokim ol tumbuna bipo olsem, “Yupela i mas lainim gut ol pikinini bilong yupela long olgeta lo bilong mi.”

⁶Olsem na ol lain pikinini i kamap bihain ol tu i ken lainim, na bai dispela lain i mas tokim ol pikinini bilong ol.

⁷Sapos ol i mekim olsem, bai ol dispela lain tu i ken bilip long God, na ol i no ken lusim tingting long ol samting em i bin mekim. Na bai ol i ken bihainim olgeta lo bilong em.

⁸Nogut ol i kamap wankain olsem ol tumbuna bilong ol. Ol tumbuna i bin bikhet na sakim tok bilong God, na ol i no bilip strong long em, na ol i no bihainim tok bilong en oltaim.

⁹Bipo ol Efraim i save pait long banara na spia. Tasol dispela taim pait i kirap na ol i ranawe.

¹⁰Ol i no bihainim kontrak bilong God, na ol i no laik bihainim lo bilong en.

¹¹Ol i lusim tingting long ol samting em i bin mekim na long ol mirakel em i bin wokim long ai bilong ol.

¹²Long ai bilong ol tumbuna God i wokim wanpela mirakel long ples Soan long kantri Isip.

¹³God i brukim solwara na solwara i sanap long hap na long hap, na em i bringim ol Israel i kam namel.

¹⁴Long san em i stap long klaut na em i go pas long ol, na long nait em i stap long lait bilong paia na i go pas long ol.

¹⁵Em i brukim ol ston long ples drai, na i mekim wara i kamap long daunbilo na ol i dring.

¹⁶Em i mekim wara i kamap long ston na wara i ran olsem bikpela wara long bus.

¹⁷Tasol ol i wok long mekim sin long God Antap Tru. Ol i stap long ples drai na ol i bikhet long em.

¹⁸Ol i traim God na mekim olsem. Ol i singaut strong long em i givim ol dispela kaikai ol i laikim tumas.

¹⁹Ol i tok bilas long God olsem, “God inap givim mipela planti kaikai long ples drai, a?

²⁰Tru, pastaim em i paitim ston na bikpela wara i kamap. Tasol olsem wanem? Em inap givim bret na mit long mipela, o nogat?”

²¹Orait Bikpela i harim tok bilong ol na em i kros. Em i salim paia i kam daun long ol lain bilong Jekop. Na kros bilong en i kamap bikpela tru.

²²Long wanem, ol i no bilip long em. Na ol i no laik bilip long em i laik helpim ol bai ol i stap gut.

²³Tasol maski, em i tokim skai antap na skai i op.

²⁴Orait em i salim mana i pundaun na ol i kaikai. Em i givim kaikai bilong heven long ol manmeri.

²⁵Olsem na ol i kisim kaikai bilong ol ensel. God i givim planti kaikai long ol, na ol inap tru.

²⁶Na bihain em i kirapim win long hap bilong sankamap, na long strong bilong em tasol, em i kirapim win long hap bilong saut.

²⁷Na em i mekim planti pisin i pundaun namel long ol inap olsem das bilong graun, na olsem wesan bilong nambis.

²⁸God i mekim ol dispela pisin i pundaun namel long kem bilong ol, na raunim ol haus sel bilong ol.

²⁹Olsem na ol manmeri i kaikai na i pulap tru. Dispela samting ol manmeri i krai long kisim, em God i givim ol.

³⁰Ol i wok long kaikai i stap. Ol i no kaikai pinis yet,

³¹na God i kros long ol na i kilim i dai ol strongpela man, em ol gutpela yangpela man bilong Israel.

³²God i bin wokim ol mirakel, tasol ol manmeri i wok long mekim sin moa yet na ol i no bilip long em.

³³Orait wantu tasol em i pinisim ol, olsem win i kamap long maus i save go pinis kwik. Em i bagarapim ol kwiktaim tru na ol i dai.

³⁴Taim God i kilim sampela i dai, ol arapela i tanim bel na i kam bek long em na ol i prea strong long em.

³⁵Nau ol i tingim gen, God em i wasman bilong ol. God Antap Tru em i man bilong helpim ol.

³⁶Tasol ol i giaman na mauswara nating long em.

³⁷Ol i no bihainim tok bilong em, na ol i brukim kontrak ol i bin mekim wantaim em.

³⁸Tasol God i marimari long ol na rausim sin bilong ol, na em i no bagarapim ol. Planti taim em i pasim kros bilong em, na em i no belhat long ol.

³⁹Em i tingting long ol olsem, ol i manmeri tasol, ol i olsem win i kam na i go pinis.

⁴⁰Planti taim ol i bikhet na ol i sakim tok bilong em long ples drai. Na planti taim ol i mekim em i bel hevi.

⁴¹Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol.

⁴²Ol i no tingim bikpela strong bilong em, na ol i no ting long dispela taim em i bin kisim bek ol long han bilong ol birua.

⁴³Long dispela taim em i wokim olkain mirakel long hap bilong Soan long Isip.

⁴⁴God i tanim ol wara i kamap blut na ol Isip i no inap dring.

⁴⁵Na em i salim planti lang na planti rokrok i go long ol. Na ol lang i kaikaim ol, na ol rokrok i bagarapim planti samting long ol gaden bilong ol.

⁴⁶Na God i salim ol binatang wantaim ol grasopa i kam na ol i kaikai ol samting i kamap long ol gaden bilong ol.

⁴⁷Em i salim ren olsem ais na dispela i bagarapim ol diwai wain bilong ol. Na em i mekim ais i bagarapim ol diwai fik bilong ol.

⁴⁸Em i salim bikpela ren olsem ais i kam na i kilim ol bulmakau bilong ol.

⁴⁹Em i kros moa moa yet long ol na i mekim save tru long ol. Na em i salim ol ensel i go bagarapim ol na ol i gat bikpela hevi.

⁵⁰Em i belhat long ol na em i no larim ol. Nogat. Em i salim bikpela sik long ol na ol i dai nabaut.

⁵¹Em i kilim i dai ol namba wan pikinini bilong olgeta lain bilong Isip.

⁵²Na em i olsem wasman bilong sipsip, na em i go pas na was long ol manmeri bilong en. Long ples drai em i soim rot long ol.

⁵³Em i bringim ol i go na ol i stap gut, olsem na ol i no pret. Tasol solwara i karamapim ol birua bilong ol.

⁵⁴Em i bringim ol i kam long graun bilong em yet. Em dispela ples maunten em i bin kisim long strong bilong em yet.

⁵⁵Em i rausim ol arapela lain taim ol manmeri bilong en i kam. Na em i tilim dispela graun long ol lain bilong Israel. Na em i larim ol i sindaun gut long ol haus sel bilong ol.

⁵⁶Tasol ol Israel i traim God Antap Tru na i bikhet long em. Ol i no bihainim lo bilong en.

⁵⁷Ol i bikhet na sakim tok bilong en, olsem ol tumbuna bilong ol i bin mekim bipo. Ol i olsem banara i krungut na i no save sut stret.

⁵⁸Ol i wokim ol alta bilong giaman god na dispela i mekim God i kros. Ol i wokim ol giaman god na God i bel nogut long ol.