Psalms 71:5-15

⁵SOMOL nib Th’abi Tolang, i gur e ke l’agan’ug ngom; ke pagan’ug ngom ni ka nap’an ni kugub bitir.

⁶Kug gif ngom u n’umngin e yafos rog; ka nap’an e nni gargelegeg ni gur e um yoror rog. Bay gu pining e sorok ngom ni gubin ngiyal’.

⁷Yafos rog e ke mang ba machib ko yo’or, bochan ni gur e rungrung ngog nib gel.

⁸Ga’ngin e rran ni gu be pining e sorok ngom, ma gu be weliy feni sorom.

⁹Dab mu pi’ keru’um ngog e chiney ni kug pilibthir; dab mu n’ageg e chiney ni kug me’waer.

¹⁰Pi to’ogor rog e yad ba’adag ni ngar li’edgag ngum’; ma yad be non ma yad be makath nigeg.

¹¹Yad be ga’ar, “Ke n’ag Got e cha’nir; are da leked ngad koled, ya dariy be’ nra ayuweg.”

¹²A Got, dab mu palog rog; Got rog, mu gur nigem ngam aywegeg!

¹³Mang e yigi waer min thang mit e pi’in yad be cham ngog. Mang e yigun tamra min ma’fannag e pi’in yad be guy rogon ni ngar maad’adgad ngog.

¹⁴Bay gu tay e pagan’ rog ngom ni gubin ngiyal’; bayi yo’or yay ni ngu’ug pining e sorok ngom.

¹⁵Bay gu weliy fal’ngim; polo’ e rran ni bay u gog rogon ni ga ma mat’aw nigey, ni yug aram rogon nde gaman e nangan’ rog riy.